Portada Conceyos La Conceyalía de Participación Ciudadana d’Avilés entama un cursu online de iniciación al voluntariáu

La Conceyalía de Participación Ciudadana d’Avilés entama un cursu online de iniciación al voluntariáu

by redacción asturnews

Dende’l Serviciu de Participación Ciudadana del Conceyu d’Avilés impúlsase un cursu de iniciación al voluntariáu empobináu a toes aquelles persones que tengan moliciones y tean interesaes por desenvolver unu llabor solidariu na qu’esplegar cualidaes como la solidaridá, la cooperación y el trabayu n’equipu que redunden en beneficiu del interés colectivu con especial incidencia n’ameyorar la situación d’aquellos colectivos menos favorecíos.

Pa participar nel cursu hai qu’inscribise al traviés del formulariu disponible en https://forms.gle/43KrwLgdANEotki99. El plazu p’apuntase termina’l 18 de payares. Al rematar el cursu, y superada la evaluación, va apurrise’l correspondiente certificáu acreditativu.

El cursu va desenvolvese de forma online del 20 al 30 de payares con una duración de 20 hores y lleva por títulu “Construyamos el to voluntariáu”. La Plataforma del Voluntariáu d’Asturies va ser la encargada d’impartir los conteníos. N’avientu va llevar a cabu un alcuentru virtual d’intercambiu de bones práctiques de les entidaes de voluntariáu avilesines.

Programóse de forma telemática esti cursu atendiendo a les midíes escepcionales pola Covid-19 y va desenvolvese al traviés del sistema Moodle de la Plataforma del Voluntariáu d’España. Primeramente, les persones participantes van recibir les instrucciones para’l so manexu.

Los conteníos a impartir respuenden a la necesidá de conocencies para empecipiar una actividá de voluntariáu:

  1. La participación
  2. La participación y el voluntariáu Conceutu de Voluntariáu
  3. El  procesu para exercer voluntariado
  4. Ámbito de l’acción voluntaria
  5. El desenvolvimientu de l’acción voluntaria
  6. Les relaciones del voluntariáu con otros axentes
  7. La realidá del voluntariáu. ónde, cómo, cuándo faer voluntariáu na nuesa ciudá

Ta previstu tamién un alcuentru virtual ente les entidaes de voluntariáu pal martes 15 d’avientu  coles mires d’intercambiar y conocer bones práctiques énte l’actual situación sanitaria, na que precisen afaer les sos actuaciones y ufiertar soluciones a les persones usuaries y voluntaries pa siguir col so llabor, amás d’encetar la captación de voluntariáu nel escenariu de crisis pol Covid-19.

Tola información dirá disponiéndose na web que la Conceyalía de Participación Ciudadana dispunxo pal voluntariáu: https://avilesvoluntariado.org

Les Estratexes de ciudá pa un voluntariáu del sieglu XXI” concretaron, al traviés d’un procesu participativu, los oxetivos, midíes y acciones necesaries pa fomentar el voluntariáu n’Avilés, por aciu la coordinación ente alministración, entidaes y persones voluntaries.

L’apertura de la oficina y la constitución de la Mesa del Voluntariáu en xunu d’anguaño, y na que participen 25 entidaes locales reconocíes oficialmente de voluntariáu, son les acciones principales que fixeron posible avanzar n’otres midíes conteníes nel plan.

Nestos meses, les xuntes de coordinación centráronse na sensibilización, espardimientu y capacitación pal desenvolvimientu d’estes actividaes solidaries ente les que s’atopa la puesta en marcha d’esti cursu de iniciación al voluntariáu.

Tamién te podria gustar