Portada Fiestes La Comida na Cai del Bollu 2017 d’Avilés cumple 25 años y aspira al Guinness

La Comida na Cai del Bollu 2017 d’Avilés cumple 25 años y aspira al Guinness

by redacción asturnews

La conceyala de Festexos, Ana Hevia, presentó esti día’l programa de les Fiestes d’El Bollu 2017, qu’anguaño protagoniza’l 25 aniversariu de la Comida na Cai. Pa festexalo, Hevia anunció que’l multitudinariu eventu va optar al Premiu Guinness de los Récords.

D’esta miente, Avilés va intentar convertise’l llunes 17 d’abril na ciudá cola mayor comida na cai de cuantes celebrar nel mundu. Va Tener que superar les 9.450 persones que comieron tacos nes cais de la ciudá de Metepec, en México.

Pa superar el record ye necesario que dellos notarios d’Avilés comprueben unu a unu los participantes nesta celebración. La mayor dificultá consiste en que tolos comensales tienen de tar sentaos y comiendo o realizando los preparativos, y que tan solo se dispon de 3 hores pa realizar el conteo. Pa facilitar el recuentu va avisar a los participantes de la hora averada a la que van pasar los notarios per cada zona por que tean sentaos nesi momentu. De siguío va unviase tola documentación (constatación notarial, imaxes, repercusión en prensa) al Guinness World Records pa intentar qu’esta entidá certifique ya incorpore a Avilés como la ciudá cola mayor comida na cai del mundu.

Les fiestes arrinquen el sábadu 8 d’abril cola Gala de presentación de la Xana, Xanina y Dames d’Honor nel Teatru Palacio Valdés y les actuaciones de les orquestes “Panorama” y “París de Noia” en La Esposición: los dos grandes formaciones orquestales gallegues van ufiertar un macroconcierto de 6 hores de duración. Adelántrase asina l’entamu d’El Bollu, que celebra los sos díes grandes el 15, 16 y 17 d’abril.

Hasta’l momentu, el númberu de persones inscrites na XXV Comida na Cai algama les 11.786 reserves. El plazu d’inscripción sigue abiertu hasta’l vienres 31 de marzu. L’eventu más popular de les fiestes quier celebrar les sos bodes de plata optando al Premiu Guiness a la comida más multitudinaria.

Hevia tamién presentó’l cartelu anunciador de les fiestes, obra del estudiu avilesín Signum, que coincidiendo col 25 aniversariu de la Comida na Cai otorga tol so protagonismu a esti eventu.

La coreógrafa avilesina Olga Mesa va ser la pregonera de les fiestes del Bollu d’anguaño. Fía de la poeta avilesina Marián Suárez, Olga Mesa ye una artista interdisciplinar que nes sos creaciones aúna danza, coreografía, vídeu y artes visuales. Estudió danza n’Avilés y completó los sos estudios en diversos países. Trabayó como intérprete y coreógrafa col grupu Bocanada hasta’l so treslláu a Nueva York en 1984, onde produció les sos primeres coreografíes curties. Diez año más tarde estrenó’l so primer espectáculu integral ‘Llugares Entemedios’ en Madrid.

 

Más información

Tamién te podria gustar