Portada Sociedá La Comarca la Sidra convida a los ciudadanos a “Moyase cola Llingua” na hostelería y el comerciu

La Comarca la Sidra convida a los ciudadanos a “Moyase cola Llingua” na hostelería y el comerciu

by asturnet

La Mancomunidá Comarca de la Sidra, n’andecha cola Conseyería de Cultura,y Turismu y los diferentes Conceyos y Mancomunidaes que componen la Rede de Normalización Llingüística, entama esti mes d’abril col repartu de dos campañes de promoción de la llingua asturiana, una empobinada al sector hosteleru y otra al comerciu. La campaña de promoción pal sector de la hostelería “Muéyate cola Llingua” quier complementar la campaña “Equí tas en Casa”, que tantu ésitu tuvo en pasáu añu y naz col oxetivu cimeru de favorecer l’usu del asturianu en tolos establecimientos que lo deseen teniendo en cuenta que ye ún de los sectores onde se caltién d’una manera más viva l’usu de la llingua asturiana.

La Campaña compónse de 800 serviyeteros col eslogan de la campaña, “Muéyate cola Llingua” (“Equí tas en Casa”) per una cara y pela otra con un poema d’Andrés Solar, 5000 Posavasos col mesmu eslogan, 300 cartelos promocionales centraos en mundu de la hostelería y, más en concretu, de la sidra pal so espardimientu pelos negocios de la comarca y 300 cartelos que faen referencia a la prohibición de vender tabacu a menores.

Pela so parte, el comerciu ye un de los sectores más dinámicos de la sociedá al que la llingua asturiana, si quier tener pervivencia nun pue quedar ayena. Pa incrementar la percepción del asturianu como llingua vehicular que val pa desenvolvese ensin problemes nes xeres diaries, llánzase esta campaña compuesta por 900 espetos colos nomes de los productos n’asturianu destinaos a caúna de les xebraes estayes del comerciu col eslogan “Ye Como Ye”, 15000 bolses de plásticu col eslogan “Lo que Necesites, lo que Quiés, lo que te Presta”, cartelos de rebaxes con un diseñu nuevu, nel que rescampla bien dello la parte llingüística.

Toos estos materiales, informaron en rueda de prensa esta selmana, “yá tán iguaos y van repartise dende esta mesma selmana”. Nel actu de presentación, amás de los representantes de los conceyos que componen la Mancomunidá Comarca la Sidra, y miembros del Patronatu de Turismu de la Mancomunidá, tuvieron presentes el Presidente, Alejandro Vega Riego, y la Xefa de la Oficina de Política Llingüística del Principáu, Mª Antonia Pedregal Montes.

Alejandro Vega Riego, dempués d’agradecer a la Xefa’l sofitu del Principáu pa col Serviciu, emponderó’l llabor que se vien faciendo dende la Rede de Normalización Llingüística nos Conceyos a favor de la normalización social del asturianu.

Arriendes d’esto, comentó que la Mancomunidá qu’elli preside vien dende va años “moyándose cola llingua”, y fizo referencia a les campañes de promoción que dende la mancomunidá vienen desenvolviéndose, amás del procesu de recuperación toponímica nel qu’esta comarca ye cabezalera, tando tolos conceyos que la componen colos espedientes peracabaos.

Pela so parte, La Xefa de la O. P. LL. agradeció la invitación de la Mancomunidá a esti actu de presentación, cincando enforma sobre les actuaciones que tanto dende la Mancomunidá como de los conceyos que la componen, tán dándo-y a la llingua asturiana la visivilidá y el puxu de los que tien menester. Emponderó les dos campañes que güei se presentaben n’andecha cola REDE y col sofitu de la Conseyería de Cultura y turismu, a les que-yos adivinó un gran éxitu y de les que dixo que se complementen col trabayu que se vien faciendo dende la Oficina de Política Llingüística del Principáu.

Tamién te podria gustar