Portada Emigración La colonia emigrante de Lieja remanez con una gran folixa

La colonia emigrante de Lieja remanez con una gran folixa

by asturnet

Lieja, el segundu conceyu en númberu d’emigrantes del nuestru país de Bélxica, acueye esti viernes 25 y mañana sábadu 26 el rellanzamientu del Centru Asturianu con una serie d’actos que van tener el so momentu cume nuna folixa onde van sonar aires de la tierra y a poder degustase productos gastronómicos autóctonos. La folixa convocada embaxo’l lema de ‘Xuntos’ va cuntar cola presencia del conseyeru de Xusticia y Esteriores del Principáu, Francisco Javier García Valledor, convidáu pola presidenta del centru y conceyala nel Ayuntamientu de Lieja Julie Fernández, fía d’emigrantes.

El Centru Asturianu de la segunda colonia d’emigrantes de la nuestra tierra en Bélxica remanez con nueva vitalidá después d’un periodu d’adormecimientu y va facelo con una atopada d’asturianos residentes nel país onde ta la capital de la Unión Europea. Socios del Centru Asturianu de Bruseles y los de la casa hermana de Lieja van xuntase en dos díes repletos d’actos de xermandía ente la comunidá emigrante y de reafirmación de l’asturianidá de los miles de paisanos y paisanes de la nuestra tierra que viven nel país belga.

Los actos empiecen esti viernes 25 a les 18,00 hores con una recepción oficial nel Ayuntamientu de Lieja a la colonia asturiana y a los miembros de la delegación del Principáu, encabezaos pol conseyeru de Xusticia y Esteriores, Francisco José García Valledor, el presidente del Conseyu de Comunidaes Asturianes, Manuel Fernández de la Cera y el presidente de la Federación Internacional de Centros Asturianos (FICA), José Luis Casas. El día grande va ser, sicasí, el sábadu cola celebración de la folixa ‘Xuntos’, una auténtica romería astur que va entamase nuna carpa allugada pol Ayuntamientu de Lieja nel mesmu centru de la ciudá y na xunta a actuaciones de grupos

de música y baile, va ufiertase una espicha con productos autóctonos.

Les actividaes d’esti alcuentru organícenles en xunto el Centru Asturianu de Lieja y el de Bruseles nun entamu de colaboración que quier caltenese nel futuru.Entrambes ciudaes acueyen el númberu más grande d’emigrantes asturianos en Bélxica, un país qu’agospia presencia de trabayadores del nuestru país dende hai más d’un sieglu.

Los primeros asturianos llegaron a les zones industriales del país belga a finales del sieglu XIX empobinaos poles empreses d’esa nacionalidá que calteníen esplotaciones mineres y siderúrxiques n’Asturies. Bélxica diba ser darréu país d’acoyida de persiguíos políticos nes principales movilizaciones obreres de les primeres décades del sieglu XX, sobremanera con motivu de la fuelga de 1917 y de la revolución de 1934. L’esiliu provocáu pola guerra civil va llevar nuevos ensames d’asturianos a Bélxica y décades después, dende empiezos de los años 60, van ser emigrantes económicos los que sigan el camín percorríu enantes por otros asturianos. Los últimos llegaos al país belga aportaron apocayá como funcionarios y empleaos de les instituciones europees o procedentes de la nueva emigración.

La presencia asturiana en ciudaes como Bruseles, Lieja o Charlesroi ye bultable hasta’l puntu de que les autoridaes locales y rexonales d’eses zones tienen en cuenta la interlocución cola comunidá de los nuestros paisanos al mesmu nivel que con otres comunidaes procedentes del sur d’Europa, Turquía o el Magreb. Una amuesa de la importancia de la comunidá asturiana en Bélxica ye la presencia nel Ayuntamientu de Lieja d’una conceyal fía d’emigrantes: Julie Fernández, militante del Partíu Socialista Belga y actual presidenta del Centru Asturianu de la ciudá onde desenvuelve’l so cargu políticu.

Tamién te podria gustar