Portada Música La Col.lá Propinde anuncia nuevu discu: A TEYAVANA

La Col.lá Propinde anuncia nuevu discu: A TEYAVANA

by asturnet

El grupu l.lenizu La Col.lá Propinde, ta terminando de preparar lo que va ser el so tercer discu d’estudiu tituláu A TEYAVANA. El discu van sacalu cola so discográfica AMBITU-L’AGUAÑAZ pa la seronda, “nun sabemos mui bien si pa finales de setiembre o yá pa ochobre”.

La Col.lá entamó a grabar nel mes de mayu nos Estudios TUTU de Corevera con Sergio Rodríguez como Productor. “Tamos grabando unos 15 temes pa depués escoyer unos 11 o 12, non más” “Entá nos queda grabar dalguna cosina ya igualo too terminar el trabayu”. De momento, La Col.lá nun quier adelantar na al rodiu del mesmu. Nel discu van poder sentise temes tradicionales y temes de composición propia, munchos d’ellos pa cantar.

“En cuanto al tútulu, decidimos que fuere A TEYAVANA, porque de xemes, sentímonos asina y la nuestra música ta siempre al descubieto, ensin ninguna barrera ni teyao. Con esti títulu queremos facer el nuestru homenaxe particular a Nel Amaro, un bon amigu del grupu, quien escribió una bona montonera de columnes periodístiques entitulaes de la mesma manera, con un conteníu siempre perinteresante”.

Tamién quieren incluyir dientro del discu, un tema que prepararon pal programa de Camín de Cantares dirixíu por Xose Antón Ambás, col que se zarró esta temporada. “El tema ye una reel.laboración que nos pasó Ambás sobre dos pieces del Gaitiru de Carabanzo y la verdá ye que foi una experiencia prestosa y si ye posible meterémoslu dientro del discu como daqué mui especial pa nos”.

Esti branu vienen de tocar de Sons do Vento en Galiza y vamos poder velos el prósimu día nueve d’agostu en Valdesoto (Siero) y el 22 d’agostu en Xixón, nel Festival 5º40”, onde adelantarán dalgún de los temes nuevos pa ver como furrulen col públicu. “Dempués de L.L y GÜERIA, esperemos que a la xente y siga prestando A TEYAVANA”.

Páxina Web de La Col.lá Propinde

Tamién te podria gustar