La Catedral acueye hasta final d’añu la esposición “El Salvador y los 12 apóstoles. El Greco by Lombardía ”

La Catedral acueye hasta final d’añu la esposición “El Salvador y los 12 apóstoles. El Greco by Lombardía ”
11 ochobre 09:09 2021 Imprimir

La Catedral d’Uviéu va acoyer hasta final d’añu la esposición “El Salvador y los 12 apóstoles. El Greco by Lombardía” que va tar abierta hasta la fin d’añu.

Una de les Capiyes cimeres de la Catedral d’Uviéu acueye dende esta selmana, y hasta el 31 d’avientu, la esposición “El Salvador y los 12 apóstoles. El Greco by Lombardía ” como parte de los actos conmemorativos de los 1.200 años d’hestoria del templu y dientro  de la programación de la campaña municipal “Uviéu, Orixe del Camín”. L’amuesa, que forma parte de los actos programaos con motivu del aniversariu de los 1.200 años d’hestoria del templu y de la campaña “Uviéu, Orixe del Camín” inclúi cinco de los trelce colecciones que realizó’l pintor espresionista Miguel Ángel Lombardía reinterpretando l’Apostoláu d’Uviéu del Greco.

L’amuesa foi inaugurada esta selmana pol conceyal de Turismu, Alfredo García Quintana; el director xeneral de Cultura y Patrimoniu del Principáu d’Asturies, Pablo Llión; el deán de la Catedral, Benito Gallego; l’artista Miguel Ángel Lombardía y el director de la esposición, Gabino Bustu.

Na so intervención, Quintana destacó qu’esta amuesa, compuesta por 5 de les 13 obres que Miguel Ángel Lombardía pintó dende 2019 hasta febreru de 2021, sol títulu xenéricu “Apostolaos: el Greco por Lombardía”, “sumase  a los innumberables curiosos y ayalgues que’l templu alluga: la Cámara Santa coles reliquies del Santu Sudariu, la Cruz de la Victoria y la Cruz de los Ánxeles; el panteón Real coles tumbes de los reis de la monarquía asturiana” o la torre, que llueu va ser reparada gracies a una inversión municipal de 100.000 euros “para ameyorar l’accesu al públicu y que contien la Wamba, la más antigua del mundu n’activu”.  Esti sofitu económicu per parte del Conceyu d’Uviéu ye solo una amuesa “del compromisu municipal cola conmemoración del aniversariu de la Catedral. Una efeméride que, amás de la so relevancia histórica, ufiértanos una oportunidá única para siguir promocionando la nuesa ciudá y atraer visitantes. Porque creemos nun turismu calidable (…) nel que faemos fincapié nel rigor histórico, que nos entronca colos nuesos raigaños y que ye apreciáu por un turista cultu y sensible”. Nesti sentíu’l conceyal destacó qu’anguaño s’invirtieron munchos recursos y esfuerzos para asitiar la ciudá como destín de referencia n’España. La campaña “Uviéu, Orixe del Camín, ta teniendo una gran acoyida al igual que los actos entamaos col Principáu d’Asturies y el Cabildru para la celebración de los 1200 años de la Catedral”.

El director xeneral de Patrimoniu quixo convidar a tolos vecinos y turistes a averase hasta la Catedral  yá que “tantu’l continente como la esposición en sí, fai que mereza la pena, agora más que nunca, esta visita” y xusto nesti momentu, “a una selmana de que se cumpla’l 1.200 aniversariu de la consagración del templu. Tamos énte un fechu históricu que nos  remonta a los oríxenes de la monarquía asturiana. Esta esposiciones y el restu de celebraciones como los que se tán faciendo dende principios  de mes, solo sirven pa realzar y que los asturianos deamos cuenta de lo que tenemos”.

Según destacó’l Deán, podrá aportase a l’amuesa “hasta’l 31 d’avientu” cola entrada pa visitar la Catedral, siendo l’horariu,  de llunes a vienres y mientres el mes d’ochobre, de 10:00 a 13:00 y de 16:00 a 18:00 hores, ente que  en payares y avientu va abrir de 10:00 a 13:00 y de 16:00 a 17:00 hores.  Los sábados l’horariu va ser de 10:00 a 13:00 y de 16:00 a 17:00 hores. Los domingos va permanecer zarráu a les visites turístiques, al tar abiertu al cultu. Tamién va haber posibilidá de visitar la esposición de forma gratuita: los llunes y los martes n’ochobre de 13:00 a 14:00 y de 18:00 a 19:00 hores y nos meses de payares y avientu de 13:00 a 14:00 y de 17:00 a 18:00 hores.

  Categories: