Portada Comunicación La Casa de Cultura acueye la esposición “Avilex. Deporte en blancu y negru”

La Casa de Cultura acueye la esposición “Avilex. Deporte en blancu y negru”

by redacción asturnews

Hasta’l 13 d’avientu y dientro de los actos del 40 aniversariu de la Fundación deportiva Municipal (FDM) La Casa de Cultura acueye la esposición “Avilex. Deporte en blancu y negru”. Una esposición que se compón de 60 fotografíes en blancu y negru que recueyen distintos intres de la práctica de diverses disciplines deportives na ciudá, dende los años 50 hasta los 80.

La sala d’esposiciones de la Casa Municipal de Cultura acueye dende’l pasáu xueves 29 de payares y hasta el xueves 13 d’avientu la esposición fotográfica “Avilex. Deporte en blancu y negru”, incluyida nel programa d’actos entamaos con motivu del 40º aniversariu de la creación de la Fundación Deportiva Municipal (FDM).

L’amuesa componse de 60 imaxes en blancu y negru que recueyen intres de la práctica de distintes modalidaes deportives nel conceyu, dende la década de los años 50 hasta la de los 80. Estes fotografíes proceden na so mayoría de los arquivos de l’Asociación Atlética Avilesina y del Grupu d’Empresa de Ensidesa. La esposición va permanecer abierta al públicu de llunes a sábadu, n’horariu de 11 a 13 y de 18 a 21 hores.

La FDM foi creada por alcuerdu del Plenu Municipal na sesión ordinaria del 23 de febreru de 1978, convirtiéndose na fundación deportiva decana n’Asturies y n’una de les primeres d’España en funcionar con esta estructura para la xestión del deporte municipal. La so creación tuvo motivada en gran parte pola importante tradición deportiva na ciudá, y pola necesidá de dar continuidá al llabor entamáu dende munchos años tras por persones y entidaes impulsoras del desenvolvimientu de la práctica deportiva nel conceyu, daqué que la esposición reflexa en bona midida.

Dende va cuarenta años, la Fundación Deportiva Municipal vien trabayando cola fin de faer del deporte n’Avilés una forma de vida saludable, sobro la base de promocionar la práctica deportiva en tola so estensión, favoreciendo’l asociacionismo deportivu y ufiertando xuna rede d’instalaciones calidable acorde a la programación d’actividaes.

Integrar a colectivos de persones con dalgún tipu de discapacidá, sofitar al deporte escolar o poner a disposición de la ciudadanía un serviciu de Medicina Deportiva son otros oxetivos cumplíos pola FDM mientres estos 40 años, nos que tamién se llogró dinamizar la economía y el turismu na ciudá al traviés de la realización d’acontecimientos deportivos sostenibles.

Tamién te podria gustar