Portada Fiestes ‘La Carriona Rock’ d’Avilés celebra so VII edición con cincu conciertos

‘La Carriona Rock’ d’Avilés celebra so VII edición con cincu conciertos

by redacción asturnews

La conceyala de Cultura, Yolanda Alonso; la Presidenta de l’Asociación de Vecinos La Xunta de La Carriona, Merced Cano; José García Llobu, miembru de la AAVV y los miembros del nuevu grupu ‘Rock Rules’, presentaron esti día la séptima edición de ‘La Carriona Rock’, un festival musical que se va celebrar el próximu vienres, 9 de setiembre, enmarcáu nel entamu de la fiestes del barriu.

‘Envidia Kotxina’ y ‘Casu Omiso’ encabecen el cartelu d’esti festival nel que tamién van actuar ‘Sartenazu Cerebral’, ‘Rock Rules’ y ‘Infection’. Los conciertos van empecipiar a les 20,30 hores nel Parque de La Carriona. Antes, a les 17 hores, va dase’l chupinazo oficial a los festexos col pregón  al cargu d’Alfonso Abel Vázquez, párrocu del barriu, nel salón d’actos del Centru Sociocultural. De siguío, va haber merienda y animación pa los mayores del barriu nel mesmu enclave.

El sábadu, día 10, va haber pela mañana una diana floriada, un pasacais y un partíu de fútbol sala; pela tarde, el Show de Susana’, con un espectáculu pa los más pequenos. A les 21.00 hores va empezar la verbena cola orquesta ‘Traveling’ y el dúo ‘Rocío Maseda’.

L’últimu día de les fiestes va ser el domingu. La xornada va empezar con una procesión acompañada peles bandes de tambores de les confreríes de San Pedro de Rivero y El Besu de Judas, que va concluyir con una misa de campaña nel prao de la fiesta. De siguío, va ser la repartida del bollu y la botella de vinu a los miembros de l’asociación de vecinos y, dende les 14:30 hores, la décima comida d’hermandá nel parque. Pela tarde, animación musical y la postrera verbena, con ‘Cabaré’ y ‘Tándem’.

Tamién te podria gustar