La carrera al Rectoráu entama con un alderique d’El Comercio

La carrera al Rectoráu entama con un alderique d’El Comercio
07 marzu 09:01 2016 Imprimir

Un debate nel diariu El Comercio dio esti domingu la salida de la carrera electoral al Rectoráu de la Universidá d’Uviñeu na que compiten cuatro candidatos y de la que lo asturiano entá nun asomó malpenes la cabeza nel alderique espublizáu pol periódicu asturianu.

“Soy de Verdiciu. Nací a la vera del Cabu Peñes en 1955 y soy hijo de una familia de agricultores. Yo lo que hacía de pequeño era ir a por la yerba y cuidar les vaques”, dicía Santiago garcía Granda nel so perfil d’esti domingu. Les referencies a la procedencia cultural y la identida astur foron de lo poco que pudo vese alrodiu dela llingua y la cultura d’Asturies nel debate convocáu pol periódicu El Comerciu col que los cuatro candidatos a Rector entamaron la precampaña que va llevar hasta la fin d’abril.

Son trés químicos y un psicólogu los qu’entamen la carrera electoral: trés d’ellos tuvieron esperiencia na xestión, nel casu del psicólogu, José Muñiz, como vicerrector con Santiago Gascón, Pedro Sánchez Lazo con Marcos Vallaure y Juan Vázquez y Santiago García Granda demientres el primer mandatu de Gotor, mentantu qu’Agustín Costa autocalificábase de ‘outsider’ nesti alderique n’EL COMERCIU.

La edá ye otru referente, porque namái Santiago García Granda aportaría al l términu del so primer mandatu ensin algamar la edá ‘obligatoria’ de xubilación, los 70 años, y tolos candidatos falen de planes a llargu plazu, ente ocho y diez años.

L’alderique del periódicu asturianu sirvió pa falar de cuestiones económiques: de les matrícules, de la relación col Principáu y  la relación coles empreses. Y de la coincidencia xeneral en qu’entá puede falase d’una bona Universidá: “El postreru ranking, de la de Granada, asitia a l’asturiana como’l númberu 14 de 48 y l’oxetivu sedría asitiala ente los diez primeres”, según Muñiz.

Pero pa eso hai muncho qu’andar como facía alcordanza Santiago García Granda. El catedráticu de Química-Física ufiertaba un exemplu: «El Campus d’Excelencia Internacional, que solicitamos en 2009 con una gran ilusión y que ye un gran proyectu estratéxicu pa la Universidá, desafortunadamente morrer a los pocos meses. Y foi porque’l financiamientu que se llogró nun yera comparable cola que se taba llogrando n’Alemaña. Dacuando, había dos o tres ceros de diferencia. La falta de fondos mató esi proyectu ilusionante que sigue ende y que podría siguise trabayando n’él». Pero, na so opinión, «el fallu más importante que tuvo esi proyectu foi que la mayor parte de la Universidá nun creyó nél. Incluyida la mayor parte del equipu rectoral actual».

Un alderique que vieno acabante d’entamar pero del que entá nun xurdiera un res no que cinca a la llingua y la cultura d’Asturies y el papel que tien de xugar na futura Universidá d’Uviéu. Pero bien ye verdá qu’enta nun hai proclamada denguna candidatura y que hasta’l día 16 d’esti mes de marzu nun habrá candidatures oficiales y la campaña sedrá n’abril, depués de la Selmana Santa.

  Categories:
Loading Facebook Comments ...