Portada Sociedá La campaña de primavera nel comerciu d’Uviéu remata con mediu millón en vientes

La campaña de primavera nel comerciu d’Uviéu remata con mediu millón en vientes

by redacción asturnews

La campaña de primavera d’incentivos al consumu nel comerciu de proximidá, promovida pol Conceyu d’Uviéu, remató con casi 8.000 veceros participantes, ente los que se sortearon los 300 cheques regalo de 50 €, cada unu pa gastar naquellos comercios que partieron compres premiaes d’ente los 300 comercios del conceyu que participaron na campaña.

La variedá de comercios participantes foi bien amplia, destacando, los negocios de testil y moda, pero tamién una medría nel númberu de comercios beneficiarios nel sector de l’alimentación y los  productos de guapura y cuidos personales. Tocantes a l’allugamientu de los comercios que siguieron la campaña destacar l’alta participación nos barrios de la ciudá como La Corredoria o La Florida según na zona rural como Trubia o Cualloto.

La campaña empezó’l pasáu 25 d’abril y desenvolvióse mientres daqué más d’un mes. Los veceros participen al traviés d’una aplicación móvil, por aciu la cual rexistren les sos tickets de compra colos que participen nel sortéu los casi 8000 veceros que mercaron nos comercios de proximidá del conceyu xuntaos a la iniciativa xubieron les sos tickets de compra al traviés d’una aplicación pa optar a unu de los 300 cheques de 50 € cada unu. El sortéu de los cheques regalo fízose énte notariu y los engraciaos van tener hasta’l 18 de xunu pa trocar el so premiu nos comercios onde realizó la compra premiada.

El Conceyal d’Economía ,Javier Cuesta (PP), manifestó que “la respuesta, tanto per parte del comerciu, como de los veceros, foi escepcional, lo que pon en valor la iniciativa qu’impulsemos y anímanos a siguir desenvolviendo iniciatives de fomentu del sector. N’ochobre volveremos llanzar otra campaña, na mesma llínea y esperamos un nivel d’aceptación similar”.

La campaña, coordinada dende’l Conceyu d’Uviéu, cuntó cola collaboración de la Cámara de Comerciu d’Uviéu y les asociaciones de comerciantes.  Esta collaboración empezó en 2020 y dende entós la conceyalía d’economía movilizó 90.000 € n’incentivos a la compra nel comerciu de proximidá.

Tamién te podria gustar