La campaña de matriculación nes asignatures d’asturianu y eonaviegu llega tarde pa Iniciativa pol Asturianu

La campaña de matriculación nes asignatures d’asturianu y eonaviegu llega tarde pa Iniciativa pol Asturianu
23 xunu 16:37 2022 Imprimir

La campaña de matriculación nes asignatures d’asturianu y eonaviegu llega tarde un añu más magar los avisos d’Iniciativa pol Asturianu, que yá treslladó en delles ocasiones a les conseyeríes d’Educación y Cultural y Política Llingüística la necesidá de faer la campaña informativa en tiempu y forma, cuando de verdá seya útil pa facer medrar la matrícula nesta asignatura.

Dellos docentes dieron avisu nes últimes selmanes y díes a Iniciativa pol Asturianu de que los materiales de la campaña informativa pa la matriculación nes asignatures de Llingua Asturiana y Lliteratura y eonaviego pal próximu cursu entá nun llegaron a los centros, cuando tamos nos últimos díes del cursu y la matrícula yá ta más que fecha. Nestes selmanes, la mayor parte l’alumnáu y les families yá fixeron los trámites pa la inscripción nes optatives del cursu 2022/2023.

Esta situación vien repitiéndose nos últimos años y ye especialmente grave cuando les condiciones del contratu fechu pola Conseyería de Cultura y Política Llingüística pa esta campaña esixíen la llegada de los materiales a los centros enantes del 7 de xunu. En papel siguen esperando y entá ayeri, llunes 20 de xunu, foi cuando llegó la campaña en dixital al traviés d’un corréu lletrónicu al profesoráu.

Nesi sen, Iniciativa pol Asturianu denuncia qu’un añu más los materiales informativos de la campaña de matriculación nes asignatures d’asturianu y d’eonaviegu vuelven a llegar tarde. Si la optatividá del idioma s’alcuentra nuna situación complicada al competir con otros idiomes y otres asignatures, esta situación vuélvese entá peor cola tardanza na promoción de l’asignatura, a la qu’obliga la Llei d’Usu y l’Estatutu d’Autonomía.

La organización yá treslladó esta situación a responsables de la Conseyería d’Educación y de la propia Dirección Xeneral de Política Llingüística, muérganu encargáu de la ellaboración y desendolcu de la campaña. Iniciativa pol Asturianu reclama una meyor organización na Dirección Xeneral de Política Llingüistica pa que la campaña informativa pa la matriculación nes asignatures de Llingua Asturiana y d’eonaviegu llegue en tiempu y forma a los centros educativos y tenga una mayor efectividá. Esta neglixencia na realización de la campaña supón un grave golpe a l’asignatura.

Iniciativa pol Asturianu quier aprovechar pa dar les gracies al profesoráu que cada añu entama les sos propies campañes de difusión de l’asignatura nos centros, cubriendo la falta de cumplimientu de les obligaciones del Gobiernu d’Asturies na promoción de l’asignatura.

  Categories:
Loading Facebook Comments ...