La Cámara de Comerciu d’Uviéu pon en marcha un serviciu de Coworking dixital

by redacción asturnews | agosto 4, 2019 8:42 am

El conceyal d’Economía, Tresformamientu dixital y Comunicación del Conceyu d’Uviéu, Javier Cuesta; el presidente de la Cámara de Comerciu d’Uviéu, Carlos Paniceres, y el Director Xeneral de la Fundación Incyde, Javier Collada, presentaron esta selmana un nuevu serviciu de coworking que va facilitar el tresformamientu dixital de microempresas y pymes de la ciudá.

El proyectu escuerre un doble oxetivu: per un sitiu, poner a disposición del colectivu d’entamadores un espaciu de trabayu que facilite l’asesoramientu y  les ferramientes tecnolóxiques necesaries pa la puesta en marcha de los sos proyectos empresariales y por otru, contribuyir al tresformamientu dixital de les microempresas y pymes, col desenvolvimientu d’un programa de seminarios, eventos y xornaes que faciliten la incorporación de la tecnoloxía y la puesta en práctica de la mesma nel día ente día de los negocios.

Según destacó’l conceyal de Tresformamientu Dixital, el Conceyu siempres va sofitar proyectos como ésti, yá que s’atopa “na llínea de dinamización empresarial que defende’l nuevu gobiernu”. Esti serviciu de coworking  va dexar  “a los sectores tradicionales a asitiase nes tecnoloxíes dixitales” y va facilitar el trabayu de el entamadores con esti espaciu d’alcuentru que, según calculó Paniceres, va poder abrir les sos puertes a finales d’añu.

El proyectu cunta con un presupuestu total de 43.233 euros, siendo 34.586  euro financiación de les ayudes FEDER, y el restu, 8.646 euros, aportación del Consistoriu uvieín.  Pa ufiertar esti serviciu a los ciudadanos, va habilitase’l salón d’actos del edificiu de la Cámara de Comerciu. Un total de 90 metros cuadraos que se van destinar a amenorgar un pocu más la fienda dixital, ufiertando formación, asesoramientu, consultoría y mentorización, amás d’unu llabor de sensibilización por que los usuarios entiendan que’l tresformamientu dixital de los sos negocios ye clave pal so ésitu.

Source URL: http://asturnews.com/la-camara-de-comerciu-duvieu-pon-en-marcha-un-serviciu-de-coworking-dixital/