La baxa natalidá déxase notar nes aules

by redacción asturnews | septiembre 12, 2017 8:27 am

Les clases entamaron esti llunes con 950 alumnos menos n’Infantil, etapa que pierde catorce unidaes, nuna xornada na que’l Conseyeru d’Educación, Genaro Alonso, abogaba por un pactu pola Educación que dexe l’aprobación d’una llei «más consensuada» que la LOMCE.

A los nueve de la mañana arrincaba ayeri’l cursu escolar pa 67.550 alumnos asturianos, los de la segunda etapa d’Infantil -de 3 a 6 años- y los de Primaria. “Cola LOMCE enllantada, les reválides esaniciaes y el futuru bastante más estenu”, resumió Genaro Alonso l’entamar del cursu al mesmu tiempu que dexaba bien a les clares que les sos aspiraciones céntrense agora en que, nel ámbitu del Estáu, algámese “un pactu social y políticu pola educación que pueda concluyir con una llei orgánica muncho más consensuada que l’anterior”.

N’Asturies, la baxada de la natalidá dexóse notar nes aules d’Infantil. Ayeri incorporáronse a esta etapa 950 neños menos que l’añu anterior, lo que llevó a la Conseyería d’Educación a amenorgar en catorce’l númberu d’unidaes nesti tramu. Sicasí, hai una perllixera xubida nel númberu d’alumnos de Primaria con respectu al cursu pasáu: 27 neños más, razón pola que s’habilitaron cuatro nueves unidaes.

Source URL: http://asturnews.com/la-baxa-natalida-dexase-notar-nes-aules/