La bandera saharagüi ondeará nel balcón del Conceyu d’Uviéu

El Consistoriu de la capital va amosar con esti xestu la solidaridá escontra’l pueblu saharagüi, que’l próximu día 27 conmemora’l 40 aniversariu de la proclamación de la República Árabe Saharagüi Democrática.

L’alcalde, Wenceslao López; la vicealcaldesa, Ana Taboada y la concejala de Cooperación al Desenvolvimientu, Marisa Ponga y la vocera del grupu municipal d’IX, Cristina Pontón, recibieron esta mañana, en dependencies municipales, a la nueva Delegada Saharagüi pa España y miembru del Secretariáu Nacional del Frente Polisariu, Jira Bulahi. A la recepción asistieron amás, Ahmed Salama, Delegáu Saharagüi n’Asturies y Alberto Suárez Montiel, Presidente de l’Asociación de Solidaridá col Pueblu Saharagüi .

Unu de los asuntos trataos mientres l’alcuentru foi la confirmación, per parte del primera edil y el restu d’asistentes del Equipu de Gobiernu, de que la bandera Saharagüi ondeará nel balcón del Conceyu d’Uviéu coincidiendo, el próximu sábadu, 27 de Febreru, cola celebración del 40 aniversariu de la proclamación de la República Árabe Saharagüi Democrática. Uviéu súmase asina a la campaña estatal promovida pola Delegación Saharagüi pa España y la Coordinadora Estatal de les Asociaciones Solidaries col Pueblu Saharagüi (CEAS-Sáhara).