La banda Sleigh Bells demanda a Demi Lovato de plaxu

El grupu “indie” Sleigh Bells demandó esta selmana a la cantante de pop Demi Lovato por plaxar supuestamente’l so cantar “Infinity Guitars” pa la composición de la tema “Stars”.

Acordies con el testu de la denuncia, presentada esta selmana nun xulgáu federal de California, “la comparanza de los dos cantares revela que, siquier, la combinación de palmetaes y bombu, (…) ye sustancialmente similar en dambos trabayos”. Esa combinación consiste, acordies con Sleigh Bells, nuna estructura de trés cuartos de golpes y un descansu col bombu apurriendo un ‘contrarritmo’ a les palmetaes”.

El cantar “Infinity Guitars” pertenez al discu “Treats”, col que debutó en 2010 la banda estadounidense de música “indie” Sleigh Bells. Pela so parte, la tema “Stars” ye una pista adicional o “bonus-track” del álbum “Confident” (2015) de Demi Lovato na so versión “deluxe”.

El discutiniu alrodiu de esta supuesta copia ilexítima nun ye nueva, una y bones el 2 de noviembre de 2015 Sleigh Bells unvió un mensaxe públicu, al traviés de la rede social Twitter, a Demi Lovato: “Tamos falagaos de que ‘samplearais’ ‘Infinity Guitars’ y ‘Riot Rhythm’ pa ‘Stars’, pero nun fuimos contactaos. Tenemos qu’esclarialo”. Naquel momentu, los  productores del cantar de Demi Lovato, Carl Falk y Rami Yacoub, negaron nun comunicáu reproducíu pola revista Rolling Stone qu’usaren cortes d’otres temes pa la ellaboración de “Stars”.