La Banda Música d’Avilés celebra so 130º aniversariu con una gala-conciertu

La Banda Música d’Avilés celebra so 130º aniversariu con una gala-conciertu
03 avientu 15:11 2021 Imprimir

La Banda de Música d’Avilés va celebrar esti vienres, 3 d’avientu, la gala-conciertu de conmemoración del so 130º aniversariu. L’eventu va tener llugar nel Auditoriu de la Casa de Cultura a partir de les 20 hores.

Tratase d’un recital que tenía de celebrase en 2020, yá que foi’l pasáu añu cuando la Banda de Música d’Avilés, nacida nel senu de la Escuela d’Artes y Oficios el 22 d’ochobre de 1890, cumplió realmente 130 años de vida. Sicasí, la situación sanitaria provocada pol COVID-19 torgó la so organización, polo que va ser finalmente esti vienres cuando esti eventu celébrese.

El conciertu, que la Banda quier que sía un homenaxe a Avilés, va ser dirixíu por Daniel Santos Pérez, avilesín qu’amás de ser miembru de la formación musical d’Avilés, llegó a asumir la so dirección. Nel recital van participar grandes artistes venceyaos a la ciudá, como’l cantante Vicente Díaz, la nueva y galardonada pianista Henar Fernández Clavel, y el pequeñu cantante Josef, escoyíu para’l programa La Voz Kids, d’Antena 3, ente otros.

El programa va ser el siguiente:

Cuadonga (Preludiu asturianu), d’Emilio Cebrián Ruiz
Hey Jude, de The Beatles. Arreglu: Fabio Marqués
Argentola, de David Rivas Domínguez
Orobroy, de David Peña Dorantes. Arreglu pa Banda: Jose Mª Bernal Gutierrez
Sting Medley (Symphonicity), de Sting. Arreglu: Lorenzo Bocci
Esclavu del mar, de Vicente Díaz y Pepin Carbayos. Arreglu: Daniel Santos Pérez
Avilés, de Vicente Díaz. Arreglu: Daniel Santos Pérez

Como ye tradición, la Banda de Música d’Avilés va celebrar tamién por aciu esti conciertu la festividá de la so patrona, Santa Cecilia. De la mesma, va faese entrega de la Insinia d’Honor qu’añalmente apurre la formación, y que n’anguaño va recayer sobro Alfonso López, párrocu de San Nicolás de Bari, pol so sofitu y collaboración cola entidá.

La entrada al recital ye gratuita previa retirada d’invitación el mesmu día de l’actuación, dende les 18:00 hores, na taquilla de la Casa de Cultura.

  Categories: