La Banda Gaites Llacín presentará “Xideces” con más de 100 músicos enrriba l’escenariu de Llanes al Cubo

25 ochobre 08:08 2008 Imprimir

El prósimu vienres 31 d’ochobre de 2008 a les 22 hores y nel marcu de la programación del festival LLANES AL CUBO, la Banda Gaites LLACÍN va presentar el conciertu “XIDECES”, un espectáculu que va aconceyar a un gran elencu d’artistes invitaos, que xunto colos propios miembros de la Banda, sumarán un númberu perriba de los 100 músicos n’escena, pa tratar de reflexar en directu l’últimu trabayu discográficu qu’acaba de sacar a la lluz la formación del Conceyu Llanes.

Nel llinguax de los teyeros de Llanes, la «xíriga», Xideces, vien a dicir «les coses buenes de la vida, les coses guapes, les cosines prestoses»… Baxo estes premises preséntase l’espectáculu XIDECES de la Banda Gaites LLACÍN.

El discu garra’l títulu d’una de les pieces compuestes pol direutor Vítor Carbajal, onde puede notase la fusión ente una banda gaites y un grupu folk. A esti tema, hai que suma-y diez temes más, nos qu’apaeen delles pieces tradicionales asturianes del mundu de la tonada («Lloraba una cabraliega», «En la gaita traigo a Asturies»), del baille y de les dances («Trillu», «El Ramu Vibañu», «La h.oguera») y otres igües de pieces bretones, irlandeses y escoceses.

La Banda Gaites LLACÍN ufre un nuevu espectáculu onde s’aprecia la so evolución musical, dexando d’un llau’l traxe tradicional asturianu, y con una puesta n’escena como una formación musical más: una banda gaites, pero na compañía de músicos de diferentes grupos asturianos como Felpeyu, Tejedor, Tuenda, Corquiéu, Niundes, Blima, Vaudi, Danzaina, D’Escarpinos, y Tutu E., arriendes de dellos componentes de la Bagad Kemper, la campeona Banda bretona cola que la banda caltién una bona relación dende fai tiempu.

El formatu que se presenta esta nueche na villa llanisca, sedrá únicu pola so complexidá y poles circunstancies que tienen que dase p’axuntar a tolos artistes que van facer posible esti eventu . Poro, pa que nun s’escaeza y pa que seya un sofitu pala promoción de la banda, va grabase con vistes a la un futuru DVD que dexe constancia del mesmu.

Esti nuevu conceptu amestando per un llau la idea de banda a la que tamos avezaos, y per otru, la banda como gran formación d’escenariu, presentose yá los pasaos díes 19 de xunetu en Porrúa y el 5 de setiembre nel Festival Internacional Folk de Getxo onde pudieren disfrutalu más de dos mil persones. Agora, pa LLANES AL CUBO, la Banda Gaites LLACÍN fai un apueste tovía más fuerte, esperando que-y preste al publicu que vaiga al conciertu y cuenta con dar continuidá a esti nuevu proyeutu que ye un retu que motiva enforma a los sos miembros pa siguir disfrutando y trabayando pola gaita.

La Banda Gaites LLACÍN ñació nel añu 1998 con 28 miembros al entamu. Agora son yá 86 los integrantes del coleutivu, colo que güei ye una de las bandes más numberoses d’Asturies. Nestos 10 años de funcionamiento la banda sacó al mercáu dos discos (Tornallás y esti Xideces que se presenta nesti festival), y fizo munches actuaciones por varios países. Podemos destacar pente elles: el Festival Intercelticu de Lorient 2006, el Festival de Cornouaille (Quimper) en varies ediciones, el Filets Bleus (Concarneau) 2005 en Bretaña, o’l Festival del Día de San Patriciu 2007 en Dublín (Irlanda), onde la banda algamó les distinciones a la meyor banda de la so categoría y el premiu “Best Overall Band” a la meyor banda del festival de les manes d’un xuráu especializáu.

La banda tamién tuvo l’honor de compartir escenariu nesti periodu de tiempu con dellos grandes nomes de la música folk como Carlos Núñez, Hevia o Tejedor.

  Categories:
Loading Facebook Comments ...