La banda de Gaites de Corvera algama’l Premiu a la meyor formación estranxera nel pasucais de San Patricio de 2006

17 xineru 00:42 2007 Imprimir

La Banda de Gaites de Corvera algamó, per segunda vegada, el premiu a la meyor formación estranxera nel pasucais qu’añalmente se cellebra en Nueva York en conmemoración de la festividá de San Patriciu, patronu d’Irlanda. El prósimu 26 de xineru la banda recoyerá esti galardón nun actu que se va facer n’Uviéu.
El desfile de San Patricio cellébrase tolos 17 de marzo en Nueva York dende 1762, añu nel que soldaos irlandeses marcharon sobre la ciudá. Esti desfile tien alredor d’unos 2 millones d’espectadores y ye una de les grandes cites añales del mundu celta.

La Banda de Gaites de Corvera entamó’l so trabayu en 1999, teniendo como base a les y los alumnos de la Escuela Municipal de Música de Corvera. El so primer trabayu discográficu “Al debalu”, asoleyáu en 2006 por Grabaciones Pola, vendió les primeres 4.500 y yá sacó na cai la so segunda edición. Nesti trabayu discográficu faese un recorríu por sones perestremaos como les habaneres, norteamericanos, irlandeses… ensin escaecer los sones tradicionales asturianos como “Cuando yo fui a Cuadonga” o l”Himnu d’Asturies”.

Bras Rodrigo, director de la Banda de Gaites de Corvera, considera que la so banda entamó un camín nel desfile de San Patriciu. Esti camín ye’l que tan siguiendo otres bandes del restu de les naciones celtes, en referencia a la participación na edición de 2007 d’una banda de gaites bretona.

  Categories:
Loading Facebook Comments ...