L-R, Rubén Alba, Fonte Fuécara y Prau Llerón van dir esti 2019 a Lorient

La Banda ganadora de los premios AMAS 2019, Fonte Fuécara de Llanera, el Grupu Folclóricu Prau Llerón, ún de los gaiteros más premiaos de Lorient, Rubén Alba, y el grupu L-R van ser los representantes cimeros d’astruies nel 49 Festival intercélticu de Lorient, qu’esti añu tien a Galicia de protagonista.

Los gallegos Carlos Núñez, Mercedes Peón y Milladoiro van ser tres de les referencies cimeres de Lorient 2019, un festival qu’esti añu tamién va cuntar colos nuevos sones bretones de Nolwenn Leroy, la celebración de los 30 años na escena de Soldat Louis, los 70 años de la Bagad de Kemper.

La participación asturiana va entamar el sábadu día 3 cola Master Class que va ufrir pela mañana bien ceo nel Palaciu de Congresos de Lorient el gaiteru Pedro Pangua. Esi mesmu día celebrase’l 34 Troféu Mac Crimmon de Gaita nel que van participar cuatro gaiteros asturianos xunta polo menos otros cuatro gaiteros gallegos. Y ya nun habrá participación astur, cola esceición de la participación na Gran Parada de los Países Celtes del domingu, hasta’l llunes 5 d’agostu a les dos y media nel Espace Marine onde fadrá la so primer actuación la Banda de Gaites Fonte Fuécara.

El llunes 5 ye tamién el día del estrenu del grupu L-R que va presentar na Soirée Folk del Palaciu de Congresos el so nuevu discu xunta los bretones Mairi Rankin y Eric Wright.

Pal miércoles 7 aportará Rubén Alba a presentar el so trabayu na actuación “La Bretagne invite” qu se celebra na carpa de Bretaña, repitiendo actuación el xueves nel Palaciu de Congresos a les tres de la tardi nuna de les diaries “Après-midi du Folk” xunta los galeses NoGood Boyo. Esi mesmu día, media hora enantes estrenaránse los componentes del Grupu Folclóricu Prau Llerón nel Espace Marine.

El programa completu alcuéntrase disponible dende la selmana pasada na web del Festival. Dende equí pue descargase’l programa completu en francés.