L-R espeya en Lorient por qué la música asturiano sigue viviendo la so edá d’oru

by redacción asturnews | agosto 8, 2019 1:35 pm

Leticia y Rubén volvieron amosar, esta vegada en tierres bretones, que la so propuesta post-folk acomódase a tolos escenarios y colos meyores preseos. Esta vegada foi en Lorient, nel Palaciu de Congresos, un escenariu pa conciertos seliquinos, onde l’aire occidental de la pareya, col sofitu de dos pareyes de baile y la voz nun tema de Silvia Quesada, dexó bien a les clares la solidez de la so propuesta.

Y ye que L-R son sinceros y cenciellos como lo ye la so propuesta musical: un dúo formáu por Leticia Baselgas (voz y percusión) y Rubén Bada (guitarres eléctriques y efectos) que quier y llogra reinterpretar la música tradicional asturiana al traviés de la fusión de dos preseos aparentemente bien distintos. Son la pandereta y la guitarra eléctrica, pero col sofitu de la presencia costante de Leticia enrriba l’escenariu y el pedal-looper ewl que saca bon partíu Rubén, paecen más en cada actuación.

El so principal oxetivu dicen que ye faer una llectura personal y contemporanea de la música asturiana pero calteniendo los ritmos tradicionales pal baille ya incluyendo otros soníos más próximos al blues, al jazz o al rock. Y sobrepasen esi tímidu obxetivu enforma. Dende qu’editaron “L-R Post-folk asturianu”, discu del que falen siempre como la so llectura personal de la tradición a partir d’una estética propia, nun faen más qu’afitar la so propuesta. Ye la resultancia de dos músicos d’oldeada trayectoria, porque Rubén Bada, guitarrista y violinista que tamién toca’l bouzouki, ya formara parte de bien de grupos que van de “Xéliba” o “Corquieu” a “N’Arba” o “Dixebra·. Y Leticia Baselgas ye una gran panderetera que tuvo primero en “Muyeres” y collaboró, ente otros, con “Losone” o Pablo Und Destruktion.

Nel conciertu del Palais de Congres de Lorient tuvo la música asturiana bien amosada colos ritmos tradicionales pal baille más occidental, repleta de sones d’arriba bien executaos y meyor baillaos por Luis Ángel y los/es sos collacies de Prau Llerón pero incluyendo tamién otros soníos dafechamente averaos al blues, al jazz o’l rock.

Esta selmana en Lorient, cuntaron amás col sofitu de Silvia Quesada, que ta grabando discu, pa afitar entá más la so propuesta con brillos corales que nun faen sinon allargar la calidá de les sos propuestes: emoción, tradición, modernidá… lo qu’Asturies tien asgaya nesta xeneración musical y namái necesita que l’Asturies institucional quite la venda los güeyos y entame a espardelo con una política cultural propia del sieglu nel que vivimos.

Leticia González ye panderetera y cuenta con una amplia esperiencia n’ámbitu del folclor asturianu. Formó parte de diversos colectivos de cultura tradicional d’ente los que destaca’l Conceyu de Cultura Tradicional Vezos Ástures. Tuvo en grupos como Menaxatruá o Trovando Tríu y collaboró viviegamente con otres agrupaciones como Xeitu. Dende l’añu 2009 forma parte de l’Asociación de Música Tradicional Muyeres y sigue ampliando la so trayectoria faciendo pequenes collaboraciones con otres formaciones musicales como Lorena Álvarez o Pablo Und Destruktion.

Rubén Bada ye unu de los músicos folk asturianos con más proyección internacional. Violinista, guitarrista y conocíu principalmente por tocar el bouzouki, formó parte de grupos como Xéliba, Corquieu, N´Arba, Dixebra, collaboró cola Banda Gaites Llacín, Mari Lluz Cristobal Caunedo, Texedor o DRD. Na actualidá forma parte del grupu L-R, Aú?, Alce y Navaya, Alfredo González, Midnight Special y collabora davezu cola Banda Gaites el Trasno de Cuaña. Destaquen les sos collaboraciones col grupu irlandés At First Light y el gaiteru John McSherry, el gaiteru gallegu Anxo Lorenzo o l’irlandés Barry Kerr. Tamién participó nel primer discu en solitariu de Sylvain Barou. Ente les sos reconocencies, Rubén ganó un primer premiu nel concursu de pareyes instrumentales del “Muséu del pueblu d’Asturies” y cuenta con un premiu “Ames” de la crítica musical asturiana como meyor instrumentista.

Source URL: http://asturnews.com/l-r-espeya-en-lorient-por-que-la-musica-asturiano-sigue-viviendo-la-so-eda-doru/