L.lena ufre 8.000 euros en sovenciones a la cultura de nueso

L.lena ufre 8.000 euros en sovenciones a la cultura de nueso
08 setiembre 14:20 2015 Imprimir

El Conceyu de L.lena destina, pal exerciciu 2015, una cuantía global de 52.290 euros pa sovenciones destinaes a distintos colectivos y entidaes del conceyu, de les qu’aparta 8.000 pa potenciar la cultura asturiana nes fiestes de los pueblos.

Les subvenciones destinaes a potenciar la cultura asturiana nes fiestes de los pueblos xuben a 8.000 euros. Van Poder aportar a la convocatoria les comisiones de festexos estables o aquelles surdíes d’iniciatives vecinales representatives y les asociaciones de comerciantes y hosteleros con programa d’actividaes añal. La documentación tendrá de presentase nel Serviciu d’Atención Ciudadana de La Ería hasta’l 30 d’ochobre d’anguaño.

Pa les asociaciones cultural y xuvenil destínense 6.200 euros, de los que 700 van ser p’asociaciones xuveniles y 5.500 euros pa les asociaciones culturales. El plazu pa presentar la documentación remata’l 30 de setiembre nel Rexistru Xeneral del Serviciu d’Atención Ciudadana nel parque La Ería.

Pa les Organizaciones Non Gubernamentales que realicen actividaes nel campu de la Cooperación Internacional pal Desenvolvimientu l’alministración l.leniza destina 3.000 euros. Les solicitúes, xuntu cola documentación correspondiente, tendrán de presentase nel Rexistru Xeneral del Conceyu hasta’l día 30 del presente mes de setiembre.

Pa les asociaciones de Madres y Padres d’Alumnos del conceyu destínense 2.000 euros. La documentación pa participar na convocatoria tendrá de presentase nel Rexistru Xeneral del Serviciu d’Atención Ciudadana del Conceyu, nel parque La Ería, hasta l’últimu día d’esti mes.

Les subvenciones deportives xuben a 30.000 euros. Van Tar partíes en dellos grupos: el financiamientu (porcentual) de los gastos de los clubes deportivos básicos; eventos deportivos; ayudes económiques pa méritos individuales destinaes a deportistes l.lenizos non profesionales y ayudes a la promoción de la estación iverniza y de monte Valgrande-Payares”. Estes postreres tán destinaes a sufragar un porcentaxe de los gastos derivaos del tresporte pa la participación de los escolares de los Centros Docentes de L.lena mientres la celebración de la Selmana Blanca Escolar. El plazu de presentación de solicitúes va rematar el 30 de setiembre pa los grupos 1º, 3º y 4º (centros docentes participación de la Selmana Blanca), y el 31 d’ochobre pal grupu 2º.

Pa les entidaes que desenvuelvan actividaes empobinaes a la promoción de la muyer nel conceyu destínense 740 euros. La documentación tendrá de presentase nel Rexistru Xeneral del Conceyu de L.lena hasta’l día 30 de setiembre. Nel mesmu llugar y col mesmu plazu tendrán de presentar la documentación les entidaes que desenvuelvan actividaes d’acción social y mayores. Pa estos postreros, la cuantía xube a 2.350 euros.

L’equipu de Gobiernu d’IX de L.lena caltien el so nivel de compromisu colos vecinos y les distintes entidaes y asociaciones pal desenvolvimientu de les sos actividaes, magar los retayos nes ayudes de los últimos años tantu de l’alministración central como l’autonómica.

Loading Facebook Comments ...