L’Edificiu Hestóricu de la Universidá acueye la esposición ‘Arte fósil’

La Universidá d’Uviéu acueye dende’l 3 de xunu la esposición Fossil Art (Arte fósil), una magnífica colección de restos fósiles de seres vivos qu’habitaron el planeta va millones d’años. Asturies ye’l segundu llugar onde recala esta amuesa, dirixida por Adolf Seilacher del Institutu Xeolóxicu de la Universidá de Tubinga, tres el so pasu pol Parque de les Ciencies de Granada.

La esposición, entamada en collaboración con Caxastur, va poder visitase mientres xunu y xunetu en dos sales del claustru perbaxo del Edificiu Hestóricu, nun cuidáu y complicáu montaxe debíu al gran tamañu de les pieces. L’oxetivu nun ye namás averar al visitante al pasáu remotu al traviés de fósiles qu’amuesen como yera la vida primitiva, sinón amosar tamién la guapura estética d’estes formaciones que superaron el pasu del tiempu.

Los especímenes d’esta esposición zarren más de mil millones d’años de la hestoria de la Tierra y amuesen que l’actividá y el comportamientu de los organismos puede ser tan guapu como la forma orgánica. La esposición ta compuesta de 40 piece de gran formatu de traces fósiles y estructures sedimentaries escepcionales documentadas por tol mundu.

La combinación ente’l tratamientu artísticu y científicu de los oxetos espuestos cautiva al visitante: naide que perciba arte neses plaques de piedra va poder dexar de preguntar el cómo y porqué del so orixe. Y nenguna persona capaz d’almirar les sos estrañes formes va poder dexar d’ignorar el mensaxe científicu que zarren sobre’l pasáu del planeta. Arte y ciencia xúnense nesta esposición pa ufiertar aspeutos complementarios que nos ayudar a apreciar y esfrutar les maravíes de la naturaleza.