Portada Emigración L’Axencia Asturiana d’Emigración entama la distribución d’una “Guía del retornu” en tolos Centros Asturianos

L’Axencia Asturiana d’Emigración entama la distribución d’una “Guía del retornu” en tolos Centros Asturianos

by asturnet

El Gobiernu d’Asturies entamó yá la distribución de la “Guía del retornu”, un documentu ellaboráu pola Asociación d’Emigrantes Españoles Retornaos d’Asturies (A.E.E.R.A) en collaboración cola Axencia Asturiana d’Emigración y que fai por recoyer tolos recursos, tanto de l’Alministración central como rexonal, que tienen al so algame les persones emigrantes que decidan retornar a Asturies.

Amás, esta guía ofrez orientaciones precises sobre cómo y cuándo facer les xestiones afechisques pa optar a dalguna de les ayudes a les que los retornaos tienen derechu. L’oxetivu final ye que naide, por desconocencia, quede al marxe de los recursos disponibles.

En total, l’Axencia Asturiana d’Emigración asoleyó 3.000 exemplares que yá emprimaron a distribuyise pelos más de 100 centros asturianos esistentes en tol mundu, con especial atención a los d’América Llatina, desque son los que necesiten facer una tramitación previa nel país nel que residen.

La primer parte de la Guía refierse a los trámites previos que ye menester facer enantes del retornu, dando cuenta de tola documentación necesaria tanto pal español retornáu como pal so cónxugue o familiares nel casu de que nun tengan la nacionalidá española.

Tamién esplica les ayudes y recursos a los que pue acceder enantes de retornar, tanto les qu’ofrez el Principáu como les de l’Alministración Central. Ente les primeres, cumple destacar l’accesu a vivienda y a places en Residencies. En cuantes a les segundes, ye posible algamar ayudes pa descuentos nel viaxe de retornu asina como franquicies pal treslláu de moblame y matriculación de vehículos.

La segunda parte aclara los trámites necesarios posteriores al retornu, tales como empadronamientu, solicitú de tarxeta sanitaria o solicitú del Documentu Nacional d’Identidá (DNI), Tamién esplica los recursos a los que pue acceder una y bona se retornó. Ente ellos, el Principáu d’Asturies ofrez la posibilidá d’ayudes individuales a emigrantes, el Salariu Social Básicu, subvenciones por alquiler de vivienda, accesu a pisos protexíos y cualesquier otru recursu nn específicu pa persones retornaes. Poles mesmes, refierse a les ayudes estatales, como pensiones non contributives, asistenciales d’ancianidá, subsidiu d’emigrante retornáu o’l seguru obligatoriu de veyura ya invalidez. La Guía finaliza con una axenda coles direcciones necesaries tanto d’organismos autonómicos como estatales, asina como de consulaos españoles nel esterior.

Tamién te podria gustar