Portada Política L’asturianismu políticu va celebrar un añu más un Día de la Nación Asturiana dixebráu

L’asturianismu políticu va celebrar un añu más un Día de la Nación Asturiana dixebráu

by asturnet

Les cuartro fuercies asturianistes de más importacia, Izquierda Xunida-Bloque por Asturies, Unión Asturianista (URAS y PAS), Andecha Astur y Unidá Nacionalista Asturiana, van celebrar esti 8 de setiembre que vien, un añu más, un Día de la Nación Asturiana dixebráu. La capital del conceyu de Casu ye’l llugar escoyíu por IX-Bloque, Cangues d’Onís y Ponga polos asturianistes, la capital d’Asturies por Andecha Astur y la villa de Candás pola UNA.

Embaxo’l lema “Por un Estatutu de primera: Sáca-yos la roxa al PP y al PSOE” Izquierda Xunida-Bloque por Asturies va celebrar el so actu políticu esti próximu 8 de setiembre, a partir de les doce la mañana, na capital del conceyu de Casu, El Campu.

Dalgo más tarde, a partir de les 13:30 hores, la coalición Unión Asturianista, formada pol Partíu Asturianista y pola Unión Renovadora Asturiana van celebrar un actu simbólicu xunto a la estatua de Pelayu de Cangues d’Onís. A les dos y media la tarde los asturinistes van treslladase al conceyu de Ponga, onde gobiernen, pa celebrar una “xinta asturianista” en Casa Ricardo, restorán asitiáu en Sellañu. Nel actu va tar presente Cándido Vega, alcalde asturianista del conceyu.

La federación de partíos Unidá Nacionalista Asturiana va celebrar el so primer 8 de setimebre dende’l cambiu de sigles y va facelo nel conceyu de Carreño, en Candás, onde la formación cuenta con representación municipal al traviés del conceyal Santiago Artime. Les actividaes concretes tovía nun tán pesllaes.

Andecha Astur, pela so parte, anunció yá la so voluntá de celebrar el día 8 de forma reivindicativa n’Uviéu con una manifestación que va salir a les 13 hores de la Estación del Norte y va finar na plaza Porlier con un actu políticu. Andecha Astur plantegaba qu’esti 8 setiembre, les formaciones sociales y polítiques asturianes ficieran la manifestación conxunta, “convocando nel mesmu espaciu y tiempu, faciendo caún la so propia convocatoria y emplegando los sos propios lemes, de tala miente que les diferiencies esistentes nel movimientu socio-políticu asturianu nun torguen la necesaria espresión de fuercia y voluntá d’entendimientu”. La propuesta, y a la vista de los planes de les demás formaciones queda esti añu pa prau.

Tamién te podria gustar