Portada Lliteratura L’Arribada celebra les dos últimes xornaes nel Muséu del Ferrocarril

L’Arribada celebra les dos últimes xornaes nel Muséu del Ferrocarril

by asturnet

L’Arribada 2009 llega esti sábadu a la so xornada de pieslle nel Muséu del Ferrocarril. Sicasí, pa güei vienres queda una llarga riestra d’actividaes programaes. La primer d’elles, va ser a les 17,00 hores, la presentación de “Pómpares al cayer” de Xuan Santori.

Media hora más tarde, Alberto Álvarez Peña, presidente de l’Arribada, va presentar “Cuentos colloraos na tradición oral asturiana”, obres espublizada por Picu Urriellu ediciones. A les seis, va presentase “Histories escoceses” de Robert Louis Stevenson, nuna traducción de Llucía Fernández Marqués.

La fin de la xornada va dedicase a la traducción al asturianu, entamando cola ponencia “Traducir al asturianu nel sieglu XXI. ¿Una xera imposible?” de Sixto Cortina, siguiendo darréu cola tertulia sobre la tema con Sixto Cortina, Inaciu Iglesias, Milio Rodríguez Cueto, Xuan Santori y Octavio Trapiella.

A les 23,00 hores, el chigre Cá Beleño acueye un conciertín de Toli Morilla pa pesllar la xornada.

El sábadu 3, día caberu de l’Arribada, a les 12, va presentase “Advenimientu”, la novela ganadora del XXIX premiu Xosefa Xovellanos, escrita por Adolfo Camilo Díaz. Darréu, a les 12,30, Rubén d’Areñes va presentar el poemariu ganador del Premiu Fernán Coronas 2008,. “Les páxines blanques”.

L’últimu actu de l’Arribada va ser a la una, cola tertulia “Cultura tradicional y televisión autonómica”, onde van participar Adolfo Camilo Díaz, Eduardo Carreño, Fernando Ornosa, Alberto Álvarez Peña y Próspero Morán, director d’Asturnews.

Tamién te podria gustar