L’Academia de la Llingua espubliza un númberu lliterariu nuevu de Lletres Asturianes

Redacción.

Dende l’añu 1982 l’Academia de la Llingua Asturiana tien por vezu espublizar un númberu lliterariu del so boletín oficial, ‘Lletres Asturianes’ coincidiendo col Día de les Lletres Asturianes. Esti númberu 95 de la revista, el venticuatro ente los dedicaos namás a la lliteratura, ábrese col tradicional ‘Entamu’ nel que l’ALLA reconoz que “la lliteratura asturiana vive un momentu de gran altor” anque “les autoridaes polítiques siguen ensin dar los pasos necesarios pa que se reconozan los derechos de los asturfalantes”.

Ilustrada esti añu con motivos mitolóxicos, esti ‘Lletres Asturianes’ recueye poemes de L.luis Fernández, Xose Bolado, Mª Esther García, Manuel Asur, Nene Losada, Lourdes Álvarez, Roberto González-Quevedo, Xurde Álvarez, Xicu Monteserín, Marisa Lopez Diz, Xaviel Vilareyo, Inaciu Galán, Xabel de Cea, Ignacio Rodríguez y Marta Mori d’Arriba, recien nomada academica de númberu, ente otros.

Nel casu de les proses atópense les voces de Vicente García Oliva con ‘Un maraviosu sucedaneu’, Berto Cobreros con ‘La pexera’, Inaciu Galán con ‘La Samarincha’, Carme Martínez cola fábula moral ‘La vaqueira y la princesa’, Jorge Fernández García con ‘Ta llueu, güelín’, Xurde Fernández con ‘Final’, Esperanza Mariño con ‘Dos amigos’, Xuan Carlos Crespos con ‘La lleenda del triste pescallunes…’, Xuan Morís con ‘Optimu n’agua’, Ruth González con ‘Pablo’, Esther García con ‘G.R.’ y ‘En blanco’ y Jaime Álvarez con ‘Carta a una madre’. Na fala eonaviega apaez poesía de Manuel García ‘Galano’ y Belen Rico Prieto y un rellatu curtiu de Mª Jose Fraga.

Na estaya de tornes apaecen poemes traducíos dende l’ingles de William Butle Yeats (1865-1939), Sara Teasdale (1884-1933), Conrad Potter Aiken (1889-1978), R.S. Thomas (1913-2000) y Archie Randolph (1926). Amás, un torna d’una de les ‘Nueve cartes portugueses de Mariana d’Alcoforado’.