L’‘Albentestate’ de Nun Tris viaxa a Uruguay y l’Arxentina

La compañía asturiana de teatru ‘Producciones Nun Tris S.L.’ entama’l prósimu 21 d’agostu una xira col so nuevu espectáculu ‘Albentestate’ que los va llevar otra vuelta pelos escenarios d’Uruguay y l’Arxentina hasta’l 12 de setiembre.

Depues del esitu que tuvieron al otru llau del charcu cola xira de ‘K.’, una versión de la obra ‘El proceso’ de Franz Kafka, cola que foron premiaos como meyor grupu estranxeru en Buenos Aires, la compañía Nun Tris vuelve a percorrer los escenarios uruguayos y arxentinos con un nuevu espectáculu: ‘Albentestate’.

Esta obra, estrenada’l pasáu mes de febreru nel Teatru de La Felguera (Llangreu), ye una adaptación d’‘Antígona’, dirixía por Ingrid López y Harold Zúñiga. ‘Albentestate’ ye la historia d’una moza, Alben, versión d’Antígona, na que se xuega cola maxa del ritu, la plástica visual del cuerpu los actores, la so espresividá y la fuerza d’un clásicu como ye ‘Antígona’.

El montaxe va tar en Buenos Aires los díes 25, 26 y 27 d’agostu, pa llegar depues a Rosario (el 31), a Campana (el 2 de setiembre), Paysandú – Uruguay (el 4), Flores (el día 6), San Jose (el 7) y, finalmente, los díes 9 y 10 en Montevideo.

Los actores que formen parte del repartu d’esta obra son Carmen Sandoval, Nieves Fernández, Arantzazu Fernández Ramos, Pablo Lomba Fernández, Nacho Quevedo y Toño Caamaño

Producciones Nun Tris