L’asturianu queda ensin periódicu en papel cola fin del selmanariu Les Noticies

27 xineru 11:04 2012 Imprimir

Al traviés d’una nota espublizada ayeri na páxina web del selmanariu Les Noticies y na edición en papel, esti vienres, l’únicu periódicu en papel qu’esistía anguaño na nuesa llingua diz adiós, pa quedar namás en formatu de diariu dixital. Esto ye lo qu’anunciaba’l so editor, Inaciu Iglesias, nun testu tituláu “Una decisión difícil”, nel que daba anuncia de que’l númberu 769, que va espublizase’l vienres 3 de xineru de 2012, sedrá’l caberu en papel d’esti mediu que lleva funcionando dende mediaos de 1996, con un númberu nos quioscos cada selmana, anque podrá siguir lleéndose na rede. El proyectu editorial yera’l primeru dafechu n’asturianu dende l’apaición en 1901 del selmanariu Ixuxú. La llingua asturiana queda agora otra vegada fuera de les rotatives, nun contestu de crisis nel qu’otros medios de comunicación asturianos tamién carecen problemes graves.

El selmanariu Les Noticies presentóse na Feria Muestres d’Asturies n’agostu de 1996 y salió al mercáu col so primer númberu un 6 de setiembre d’esi mesmu añu. N’aquella presentación en sociedá, l’editor de Les Noticies y primer director del periódicu, Inaciu Iglesias, afitó les llínies maestres del proyectu editorial: “El nuestru compromisu ye colos asturianos, colos nuestros llectores y cola so cultura particular. Esi vínculu éticu vamos a renovalu selmana a selmana hasta consiguir asentar un proyectu a toes lluces necesariu”, esplicaba. Ente los sos directores tuvieron, amás d’Iglesias, Sixto Cortina, Xuan Bello, Ramón Lluís Bande, Henrique Facuriella o Beatriz R. Viado, que se convirtió na primer directora muyer d’un periódicu asturianu.

Les amueses de solidaridá y llamentu pol fin del proyectu en papel llegaron yá per parte d’organizaciones como Iniciativa pol Asturianu, que calificó’l pieslle como “una mala noticia pal idioma”, y la Xunta pola Defensa de la Llingua Asturiana que destacaba que los años de Les Noticies “foron tamién años de creación y asentamientu d’un llinguaxe periodísticu modernu y versátil que ta valiendo de referencia nel procesu de normalización del idioma n’ámbitos diversos”.

  Categories:
Loading Facebook Comments ...