L’asturianista Humberto Gonzali designáu miembru del Comité Executivu del Partíu Popular asturianu

10 abril 10:43 2008 Imprimir

Esta selmana designóse a Humberto Gonzali como nuevu miembru del Comité Executivu Rexonal del PP. Esti Comité ye’l máximu órganu de gobiernu del partíu nel ámbitu autonómicu y la pertenencia a él implica, al tiempu, ser integrante de la Xunta Directiva del PP d’Asturies.

Ente otres, el Comité Executivu Rexonal tien la facultá d’ordenar, coordinar y controlar toles actividaes del partíu y adoptar les midíes necesaries pal cumplimientu de los alcuerdos y directrices emanaos de los Congresos y la Xunta Directiva, asina como la función d’ellaborar y adoptar informes y propuestes que se someterán al Congresu o Xunta Directiva correspondiente y de definir la estratexa xeneral de partíu y los sos pronunciamientos políticos y programáticos y afitar les llinies maestres de l’acción política de los estremaos grupos institucionales, aprobar los sos reglamentos y nomar y cesar a los voceros y cargos directivos d’aquellos.

Gonzali ye tamién dende va tiempu asesor del grupu municipal del PP xixonés, exerciendo los sos servicios como xefe técnicu cola xera d’asesoramientu de los conceyales d’esta fuercia política nel periodu corporativu 2007-2011, miembru de la Xunta Directiva de Xixón, presidente de la so Comisión de Cooperación y Solidaridá y en representación d’esti partíu ye componente de la Xunta Rectora de la Fundación Municipal de Cultura, Educación y Universidá Poular de Xixón, y Miembru de Númberu nel RIDEA.

D’otra banda ye tamién presidente del Círculu Lliberal. Como xestor cultural tien desarrollao numberoses actividaes, siendo l’entamador del foru lliterariu Arribada. Ye amás ún de los escritores más destacaos d’Asturies. Tien publicaos nueve poemarios, dos volúmenes de narrativa, traducciones dende’l catalán y francés, y numerosa obra en más d’una ventena de llibros colectivos.

  Categories:
Loading Facebook Comments ...