L’Asociación de Trabayadores de la Normalización Llingüística denuncia la situación de la Oficina de Mieres

22 febreru 05:33 2011 Imprimir

L’Asociación de Trabayadores de la Normalización Llingüística vieno acabante denunciar la situación del Serviciu de Normalización Llingüística de Mieres y desixe l’apertura nunes condiciones que garanticen la so estabilidá y continuidá “col oxetivu de que la normalización social del asturianu sía un procesu activu y participativu y non como se vien desarrollando nesti Conceyu que se-y permite tar en funcionamientu seis meses al añu, col preste de la Conseyería de Cultura”.

L’Asociación denuncia que depués de casi tres meses andaos del 2011 el Conceyu Mieres sigue col Serviciu de Normalización Llingüística peslláu y diz nun entender “porqué unos Conceyos, contando cola mesma financiación, caltienen el SNL abiertu tol añu mientres que’l de Mieres sufre añu tres añu la desconsideración, dexadez y falta de compromisu de los/les responsables municipales y, al empar, del Principáu d’Asturies. Nel casu d’esti Conceyu la situación ye bien grave, porque nesta ocasión lleva peslláu dende’l 31 d’agostu del 2010″.

Va casi pa ocho años desque s’abrieron los primeros servicios de normalización nos conceyos d’Asturies y nos que dende l’Asociación de Trabayadores de la Normalización Llingüística vienen trabayando por buscar soluciones a la inestabilidá llaboral y a la temporalidá de dellos SNL, presentando propuestes a la Dirección Xeneral de Política Llingüística pa iguar esta situación. La respuesta nestos últimos años foi sigún l’Asociación “la d’inorales y nun dar soluciones a los problemes que venimos denunciando”.

Los trabayadores de l’Asociación nun son a entender “cómo ye posible que la Dirección Xeneral de Política Llingüística conceda subvenciones pa los SNL y nun garantice’l so funcionamientu l’añu enteru y nin siquiera lleve un control de cuála ye la política llingüística que se desenvuelve nesi Conceyu”.

El pieslle del SNL de Mieres tien un problema añadíu y ye que “nestos meses pasaos los SNLs desenvolvieron, diseñaron y xustificaron toles campañes empobinaes a la normalización del asturianu. ¿Cómo les desenvolvió en Mieres si nun hai personal técnicu dende’l 31 d’agostu?”.

PA l’Asociación de Trabayadores de la Normalización Llingüística “los Conceyos tienen una responsabilidá evidente nel pieslle del SNL, pero la Conseyería, que ye la que financia’l SNL, tien una responsabilidá mayor, por ser l’organismu que xestiona esti dineru públicu y que tien el deber de controlar el so gastu y evitar la so malversión”.

La Dirección Xeneral de Política Llingüística “tien de garantizar que los SNLs puedan desenvolver el so trabayu nunes condiciones estables y dignes. El métodu pol que se financien estos servicios ye claramente insuficiente y nengún añu garantizó la continuidá de tolos SNLs y eso ye demostrable, basta con mirar pa lo que vien pasando munches veces nel Conceyu Mieres y n’otros”.

  Categories:
Loading Facebook Comments ...