L’Academia de la Llingua Asturiana pesllaba esti sábadu los XXV Cursos de Branu

28 setiembre 23:37 2007 Imprimir

El Vicerrector d’Extensión Universitaria de la Universidá d’Uviéu, Javier Mato, y la Presidenta de l’Academia de la Llingua, Ana Cano, pesllaron los XXV Cursos de Branu nun actu que tuvo llugar esti vienres a les 19:30 hores y nel que como cada añu l’Academia pieslla de manera oficial los cursos que celebra a principios d’agostu n’Ibias.

A lo llargo del actu intervinieron el direutor de los Cursos de Branu, Xosé Antón González Riaño, la Presidenta de l’Academia, Ana Cano y el Vicerrector d’Extensión Universitaria de la Universidá d’Uviéu, Javier Mato, que sorprendió a los presentes, qu’enllenaben el Salón de Graos de la Facultá de Filosofía, con una intervención nun asturianu curiáu y bien pronunciáu col que prometió asistir a la inauguración de los cursos n’Ibias l’añu entrante.

La presidenta de l’Academia nun dexó pasar la oportunidá de desixir a la Universidá, representada nel Vicerrector, mayor respetu pa que nun se sigan refugando nel rexistru xeneral los escritos en llingua asturiana o les tesis que tienen los sos títulos o resúmenes na nuesa llingua, pa que nun se tenga que depender de la bona o mala predisposición de les persones que tienen al cargu les xestiones alministratives. Ana Cano tamién fizo alcordanza de que’l Ministeriu d’Educación dexa nes manes de les Universidaes y los Gobiernos la implementación de les titulaciones que consideren afayadices, colo que ya nun se puen dar disculpes pa seguir allargando l’afitamientu de la especialidá de Filoloxía asturiana como títulu de gráu.

Nos cursos d’esti añu participaron un total de 150 alumnos matriculaos nos siete niveles que s’impartieron: Cursu Elemental de Llingua Asturiana, Cursu Avanzáu de Llingua Asturiana, Cursu de Capacitación pa la Traducción al Asturianu, toos tres inxertos nos Cursos d’Estensión Universitaria de la Universidá d’Uviéu y los cursos ‘L’asturianu na rede d’Internet’, ‘El cine n’asturianu. Aplicaciones educatives’, ‘Otros xuegos y tradiciones populares na enseñanza’, y la primera fase del ‘Curso de Capacitación en Gallego-Asturiano’.

  Categories:
Loading Facebook Comments ...