Música Kornog, N’Arba, Tarañu y Pepe Vaamonde actuarán na nueche celta d’Ayer, que tendrá meyores accesos by asturnet 25 d'agostu, 2004 written by asturnet 25 d'agostu, 2004 62 Sotu d’Ayer apuesta pola plurinacionalidá. Los bretones Kornog, los gallegos Pepe Vaamonde Grupo y les bandes asturianes N’Arba y Tarañu integren el cartel de la popular nueche celta ayerana, que se cellebra el prósimu 4 de setiembre y cuyu entornu quier meyorar l’Ayuntamientu cola meyora de los accesos al prau Llerón, escenariu’l certame. Nesti sen, técnicos del Consistoriu ayerán trabayen yá na reforma de les entraes al recintu col envís de facilitar l’accesu tanto a los vehículos como a los peatones, en previsión de que se repita la masiva afluencia de públicu d’años anteriores y seya necesaria una afayadiza organización de la circulación qu’evite incidentes. Según asoleya la páxina web del telecentru d’Ayer, el conciertu de les cuatro bandes programaes tará precedíu, dende les 17 hores, por un mercáu celta, xuegos tradicionales, un conciertu didácticu de música tradicional y una esposición sobro esi mesmu asuntu, con amuesa d’instrumentos. Amás de too ello, la compañía teatral Nun Tris realizará un espectáculu máxicu d’ambiente célticu al rodiu la medianueche. La nueche de Sotu d’Ayer, que se vien cellebrando dende 1996 con participación de primeres figures de la música folk, ye una de les cites céltiques más veteranes d’Asturies. Pa facilitar l’asistencia de públicu al certame, l’Ayuntamientu d’Ayer habilitará un serviciu especial d’autobuses que circularán ente les 5 y les 7 de la mañana dende Soto hacia dambos estremos de la cuenca’l ríu Ayer: Felechosa y Mieres. Folixa en Porcía Previamente a que la nueche de Sotu pieslle’l calendariu habitual de festivales célticos n’Asturies, la llocalidá de Porcía, nel conceyu d’El Franco, acoyerá esti fin de selmana la so Noite Celta, na que tienen previsto actuar, ente otros artistes, les bandes Llangres y Tejedor. L’Ayuntamientu d’El Franco debatió na so última sesión plenaria estraordinaria, el pasáu 18 d’agostu, una propuesta pa declarar la folixa de Porcía como “Fiesta d’Interés Turísticu Rexonal”. 0 FacebookTwitterPinterestEmail Anterior El director del Pueblu d’Asturies cuestiona la posible xunificación de fondos hestóricos de Xixón siguiente Quiroga ultima la recreación musical de la novela ‘José’ con un repartu encabezáu por Txema Blasco Tamién te podria gustar Semando Son amuesa’l nuevu folk asturiano El Trasiegu Fest va tener un mercáu con... Tatxers, Skabidean y la nueva escena musical Navarra... Algaire repite l’éxitu del 2022 en Lorient La Banda Gaites de Castrillón ufrió’l so repertoriu... Fitoria torna nueve años depués a brillar en... La Delegación asturiana en Lorient protagoniza la xornada... Jaime Álvarez gana’l 36 Troféu Mac Crimmon de... Entamó en Lorient el 52 Festival Interceltique 4200 firmes sofiten la música n’asturianu en XIxón