Juan Antonio Bayona promete una ‘Jurassic World 2’ escura

El director de cine Juan Antonio Bayona señaló esti xueves pasáu en Barcelona que dientro de siete o ocho selmanes va empezar n’Inglaterra’l rodaxe de ‘Jurassic World 2’, una película que cree va ser un “pocu más escura” qu’otres de la saga, pero tamién “bien risondera ya interesante”.

Bayona fixo estes declaraciones dempués de conocer qu’el so últimu filme, ‘Una bisarma vien veme’, consiguió once nominaciones de los IX Premios Gaudí, que se van conceder nuna gala en Barcelona, entamada pola Academia del Cine Catalán, el próximu 29 de xineru.

El director barcelonés, a entrugues de los periodistes, amosó’l so prestu por poder realizar el so nuevu proyectu, un filme d’Universal Pictures, remortina de la cuarta película más taquillera de la hestoria, al cargu de Steven Spielberg. Precisamente, Bayona indicó que quier faer una continuación del anterior ‘Jurassic World’, pero tamién una cinta “como les que fixo Spielberg”, de quien sorrayó que ye “un luxu trabayar con él, falar con él sobre la película”.

Al so xuiciu, tratase d’una persona “bien prudente” cola qu’estableció una bona relación y cola que s’atopa bien a gustu trabayando. A pesar de la insistencia de los periodistes, Bayona nun pudo avanzar muncho más sobre’l so nuevu proyectu, una gran producción que, como otres del so estilu, ta arrodiada de “un gran secretismu, con munchos fans esperándola”.