José Manuel Tejedor presentará’l so nuevu discu’l 18 de mayu n’Avilés

by redacción asturnews | mayo 8, 2018 1:56 pm

José Manuel Tejedor entama estos díes pa colos preparativos n’Avilés del conciertu-presentación, el prósimu 18 de mayu, del so primer discu en solitario: “Miraes”, nel que va amosar por qué tien llevao la so visión musical a más de 15 países nos sos casi 30 años de carrera.

A mediaos de los años 80, mientres Jesús Tejedor intentaba frente al espeyu soplar y caltener el soníu constante de la gaita ensin cansar, mientres l’espeyu-y devolvía la mirada traviesa d’un neñu que suañaba con imitar a so padre. 30 años más tarde, José Manuel Tejedor sigue alimentando esa mirada y acaba de convertila nel so prósimu trabayu discográficu – el so debut en solitariu: ‘Miraes’ (2018)

Nel camín, bien de festivales en más de 15 países d’Europa y América Llatina, decenes de premios nacionales e internacionales y cuatro discos -firmaos xunto a los sos hermanos Javier y Eva baxo la esitosa marca ‘Tejedor’- que cambiaron pa siempre el panorama de la música de raigañu fecha n’Asturies, llevándola más lloñe que naide. “De siempre tuvimos la inquietú d’ ir un poco más allá en too”, comenta Jose Manuel. “Creo que’l nuestru primer discu, ‘Texedores de suaños’ (1999) foi como un poco d’aire frescu pa una escena, la del folk rexonal y nacional de finales del sieglu pasáu, que nun terminaba d’atopar un camín definíu dientro de les denominaes “músiques del mundu”. Qu’estrelles internacionales consagraes como Phil Cunningham, Michael McGoldrick, Duncan Chisholm o Kepa Junkera compartieren y sintieren la nuesa música como la suya propia fizo que nos creyesemos más fuerte no que yá pensábemos: que la música asturiana tien un potencial d’esportación enorme y un encantu únicu.”

Revólver, Ella Baila Sola, Van Morrison, SineadO’Connor… tamién se vieron atrayíos pola mirada artística de José Manuel Tejedor. Los franceses conocenla perbien. “En Francia pusieronme’l nomatu del ”Induráin de la gaita’ a entamos de los años noventa. Miguel Induráin taba ganando tolos Tour de Francia y yo empaté tres victories nel concursu de gaita más importante a nivel internacional, el trofeu Macallan de gaita del Festival Interceltique de Lorient. Algún enterose de que yo tamién competía cola bici, rellacionaron les dos coses y… ehí lo tienes!” comenta’l músicu, ente rises.

Anguaño, José Manuel Tejedor da un pasu más y enfoca otros puntos de vista. Col llanzamientu del so primer discu en solitariu, ‘Miraes’,amuesa un nuevu perfil nel que’l gaiteru consolídase definitivamente como un perbon compositor y un braeru artesanu musical. 15 temas formen esti trabayu personal, intimista, insultantemente precisu. Flautes, teclaos y guitarres conviven al mesmu tiempu con la gaita. “Quería moveme n’un nuevu espaciu sonoru. Ye un discu minimalista, llargu y con munchos detalles, pa escuchar tranquilamente», matiza.

El prósimu 18 de mayu a les 20,30 hores empecipia esta nueva etapa. Va ser na Casa Municipal de Cultura d’Avilés n’un conciertu tremendamente especial. Xuega en casa, y sábelo. La venta d’entraes, que puen adquirise online al traviés de la plataforma de ticketing de Liberbank, confirmalo. Xunto a José Manuel, les cuerdas de Juan Yagüe, les percusiones de Juanjo Díaz y los teclaos de Richard García, co-productor del discu xunto al propiu gaiteru, arroparán la so mirada. La mirada del qu’algama ser profeta na so tierra.

Source URL: http://asturnews.com/jose-manuel-tejedor-presentaral-so-nuevu-discul-18-de-mayu-naviles/