José Fernández Meana y Teresa Sánchez Amandi son los “Paisanos del añu”

José Fernández Meana y Teresa Sánchez Amandi son los “Paisanos del añu”
14 mayu 11:10 2018 Imprimir

L’Alcalde d’Uviéu, Wenceslao López, apurrió los premios de “Paisanos del añu” a José Fernández Meana, de 100 años y vecín de Pion, en Villaviciosa, y a Teresa Sánchez Amandi de 99 años, y procedente de Miyares, Piloña, esta fin de selmana na fiesta de L’Ascensión.

L’Auditoriu Príncipe Felipe acoyó los actos del homenaxe al Paisanu y Paisana del añu qu’entamen cada añu’l Conceyu d’Uviéu, la Fundación Caxa Rural d’Asturies, La Nueva España y la Corporación Radio Televisión Española. Nesta edición reconocióse a José Fernández Meana, de 100 años y vecín de Pion, en Villaviciosa, y a Teresa Sánchez Amandi  que, a los sos 99 años, sigui viviendo nel so pueblu natal: Miyares, nel conceyu de Piloña.

Nel actu tamién se reconoció’l trabayu realizáu pol veterinariu yá xubiláu Manuel Cima García; al inxenieru agrónomu José Y. Sáenz Fernández; al inxenieru técnicu agrícola Llucía Amor Fernández y al mozu ganaderu Lucía Velasco Rodríguez.  Amás, apurrióse’l premiu ‘A la horticultura’  a la Finca’l Cabillón y el galardón en materia d’investigación reconoció’l trabayu de la veterinaria Ana Mª Balseiro Morales. ‘La Quesería Destacada’ foi anguaño para la Quesería Sociedá Cooperativa Queso Peñamellera de Llorín, en  Alles; y el galardón para l’artesanu del añu foi a manos de Friedrich Bramsteidl, austriacu de nacencia, se Santa Olaya d’Ozcos d’adopción.

Tocantes a los premios a los ganaderos, Juan Manuel Suárez Fernández, de la Ganadería Poyu S.C., llogró’l galardón na raza Frisona; Jesús Suárez Fernández foi reconocíu na raza Asturiana de los Valles y na categoría de raza Asturiana de Monte, al matrimoniu José Manuel García García y Manuela González Montes.  El premiu a les esplotaciones destacaes foi a parar a Navia pola esplotación L’Artéu S.C. propiedá d’Aurelio González, xuntu colos sos padres, Gonzalo y Madalena, y la so muyer, Montse. Tamién se reconoció, na categoría de ‘Defensa y Espardimientu de la nuesa Cultura’, a Yolanda Pérez Alonso, Directora de Banda de Gaites Ciudad d’Uviéu.

Paisanu del Añu 2018

José Fernández Meana, de 100 años, nació’l 30 de xunu de 1917, anque nun lo apuntaron hasta 9 díes dempués, el 9 de xunetu, de Pion, Villaviciosa.

Los sos padres teníen una casería en Pion, onde allegó a la escuela al pie de les sos 4 hermanos, 3 homes y una muyer, que vivíen de la llabranza. Con 17 años coló cola República  a la parte d’Uviéu, y acabó pasando la guerra civil en Santander, na Batalla del Ebro, en Menorca y en Córdoba. Tien nel so haber la medaya de la Cruz Roxa Militar y la de Campaña, tamién militar. De regresu a casa casóse y fíxose cargu de la casería de los sos padres, onde vivía cola so muyer, los sos dos fíos, los sos padres y los sos güelos. Empezaron teniendo 4 ó 5 vaques, una pareya de gües y una importante pumarada.

Na so casa en Pion atiende y anima a los pelegrinos del Camín de Santiago que pellí pasen. Tan solo dende va dos años y mientres los meses de más fríu, vive cola so fía, pero nos meses branizos torna a la so casa de Pion. Tien 5 nietos y un bisnietu.

Paisana del Añu 2018

Teresa Sánchez Amandi, de la Miyares, nel conceyu de Piloña, tien 99 años. Nació equí, en Miyares, onde vivíen los sos padres, que tuvieron 5 fíos, pero cuando ella nació la so madre púnxose bien enferma y foi criada por dos maestres. Foi a la escuela en Miyares y siguió los estudios en L’Infiestu, llegando a llograr el títulu de maestra anque nun exerció..

Tuvo 4 fíos pero dos d’ellos finaron. Les sos dos fíes ximielgues emigraron a Cataluña en busca d’un futuru meyor y d’onde, una d’elles tornó fai 11 años para curiar a los sos padres. Tien 2 nietos y una bisnieta de 21 años. N’ocasiones retomó’l so oficiu de maestra dando clases particulares dellos mozos de la zona.

Alcalde ascension ( m4a , 2.499,09 Kb )

  Categories: