Portada Entrevista de la selmana Jorge Fernández y Amparo Sarrión: “Escribir xuntos arriquez los testos”

Jorge Fernández y Amparo Sarrión: “Escribir xuntos arriquez los testos”

by asturnet

Jorge Fernández y Amparo Elena Sarrión asoleyaron xuntos dos llibros: una biografía novelada d’Einstein cola editorial Universos y un llibru pa los más pequeños con Asturtoons, “El lladrón de galletes”, amás, tamién xuntos, algamaron dalgunos premios como’l de teatru de l’Academia de la Llingua Asturiana o los de cuentos curtios Art Nalón y Bilordios de Pinón. Falamos con ellos de les sos novedaes caberes y de les sos creaciones en marcha, na Entrevista de la selmana.

-Acaben d’asoleyar dos obres escrites a comuña. Una d’elles de calter más ensayísticu, la biografía novelada d’Einstein, ¿cómo se consigue convertir una biografía, que pue paecer daqué espeso, nun llectura pa rapazos?

-Lo primero ye ponese nel pelleyu d’un neñu de 8, 9 ó 10 años que va garrar un llibru sobro una biografía d’un personaxe perconocíu y camentar qué ye lo que-y pue gustar atopar nella. Después hai que buscar eses coses curioses, eses anéudotes que-y den la chispa d’allegría y cercanía al personaxe que los neños busquen.

Munches vegaes la xente escaez que los grandes homes y les grandes muyeres de la historia fueron neños y mozos y que sintieron, amaron y amalaron como cualesquier otra persona. L’enfotu foi averar esa visión más cercana, más personal y más asemeyada a la vida de nueso y amosar la parte más “humana” del xeniu. Si a eso xunimos que-y dimos puxu a tola parte infantil y xuvenil de la vida d’Eisntein ganamos un migayu l’atención del públicu infantil.

-“El lladrón de galletes”, una hestoria pa los más pequeñinos, ¿cómo xurde esta hestoria?

-Va trés años dende qu’Amparo ficiere les práutiques de Maxisteriu nel CRA de Viella y más concretamente na escuela d’Aramil onde se desendolca l’aición d’esta hestoria. Amparo aportaba tolos díes falando d’un neñu con munchu interés en deprender y que s’esforciaba por investigar toles coses que-y arrodiaben. Esi interés por deprender dionos la idea. Dempués y d’eses esperiencies na escuela y cola intención de dar un toque didáuticu a la hestoria y averanos a los intereses de lo qu’a un neñu-y prestaría investigar fuimos dándo-y forma al “Lladrón de galletes”.

-¿Cómo ye’l procesu d’escribir un llibru a cuatro manes?

-Ye dalgo guapo ya interesante. Más que cuatro manes son dos formes de pensar y d’averase a un mesmu tema colo d’arriquecimientu qu’esto tien. Anque hai desalcuerdos siempres son más les idees comunes y les idees guapes que surden ente dambos. Puntualizaciones, espresiones, otres formes de tresmitir lo mesmo.

-¿Tienen más proyectos a comuña pal futuru?

-Tenemos yá coses feches qu’entá nun vieron la lluz y que tamién son pa neños pequeños. Fueron feches col enfotu de crear materiales pa clas colos que poder trabayar distintos temes ya intereses de los neños: educación vial, educación pa la salú, etc. Esperemos qu’en pocu tiempu puedan asoleyase.

-¿Y de forma individual?

-De forma individual Jorge va sacar dientro poco una reciella de cuentos cola editorial Trabe. La mayoría d’estos cuentos yá tan asoleyaos en distintes revistes y publicaciones como Lletres, Formientu, Lliteratura… polo que ye una xuntanza o recopilación nun solu volume.

-¿Cómo valoren l’estáu de la lliteratura infantil y xuvenil n’asturianu en comparanza con como taba va años?

-La sensación ye qu’esta lliteratura va medrando pasu a pasu. Amás, esi puxu y esi xorrecer va de la mano d’un averamientu mui importante d’autores d’altor en llingua asturiana a esti xéneru: Dolfo Camilo Díaz, Lluis Portal, Pablo Rodríguez Medina, Iris Díaz, Xurde Fernández, Esther Prieto y munchísimos otros más. Tamién hai la sensación de que los premios y certámenes nos qu’esta lliteratura se pon en xuegu son tamién cada vegada más: el Montesín de Trabe, el Xosefa Canellada, el premiu d’ASTURNEWS, Llectures pa rapazos de l’ALLA, etc… Y pa encima editoriales como Asturtoons, Universos, Pintar Pintar, Trabe, unes dedicaes n’esclusiva a la lliteratura infantil y otres qu’apuesten por ella, siguen sacando llibros pa neños al mercáu. Ye por too ello que les sensaciones son positives y nos faen pensar que l’estáu d’esta lliteratura ye bonu.

-Los dos son maestros, ¿qué pesu creen que tien la lliteratura asturiana nes escueles, y n’especial nes clases d’asturianu?

-Nesti puntu hai dos coses mui distintes de les qu’hai que falar: Per un llau ta la perbona disposición de munchos maestros d’asturianu por da-y puxu a los llibros n’asturianu pa los escolinos. Per otru llau tan los recortes, cada vegada mayores, pa los proyeutos de biblioteca o los meramente asturianos yá desaniciaos como Perdayuri. Nesi precariu equilibriu de querer y nun poder tan na mayoría de los centros. Paez que nes escueles siempres hai dalgo más importante y más urxente pal funcionamientu del centru no que gastar les perres. Poro, el pesu del trabayu na lliteratura infantil y n’asturianu ye baxu. Hai que tar mui sollertes a ufiertes y oportunidaes, por exemplu, el CRA de Viella na so perbona llabor en pro de la llingua l’añu pasáu fizo un perbon tratu cola Editorial Trabe nel momentu del pieslle de la llibrería y mercó más de 200 llibros infantiles en llingua asturiana a mui bon preciu. Pero no en tolos centros hai la mesma disposición y los mayestros tienen de lluchar abondo por consiguir dalgo asina.

-¿Cómo podría meyorase esta situación?

-Ye cuestión de perres y na situación actual tien mala solución esti problema. Amás hai que ver la situación de cada colexu. Por poner un exemplu, nel CRA de Viella tolos escolinos de 3 a 12 años (150 nenos y nenes) tan matriculaos en llingua asturiana, y eso supón una montonera de llibros pa trabayar distintes temátiques, distintos autores y distintos niveles de llectura. Pero n’otros centros el númberu ye más reducíu y eso supón que se merque menos y se-y dea menos importancia a l’adquisición d’estos llibros. Una meyor situación económica ayudaría enforma a camudar esti escenariu.

Tamién te podria gustar