Cine ‘Joker’ gana por sorpresa’l Llión d’Oru by redacción asturnews 12 de setiembre, 2019 written by redacción asturnews 12 de setiembre, 2019 42 La brillosa y complexa composición del personaxe de Joker al traviés de la destacadísima interpretación de Joaquin Phoenix reportó al cineasta neoyorquín Todd Phillips un inesperáu pero merecíu Llión d’Oru a la meyor película na 76.ª Mostra de Cine de Venecia. Roman Polanski alzose col segundu galardón más importante, el Gran Premiu del Xuráu, pol so escelente versión del casu Dreyfus, L’oficial y l’espía (J’accuse). L’italianu Luca Marinelli y la francesa Ariane Ascaride conquistaron dos copes Volpi a la meyor interpretación. Joker foi ensin dulda una de les meyores pieces esibíes dientro de la sección oficial del certame, pero pocos apostaben pola so victoria al tratase d’un filme sobro un personaxe de cómic de los que nun suelen comparecer nos festivales. La película narra los oríxenes del tipu empuestu a convertise nel gran enemigu de Batman. Ye la hestoria de cómo se forxa un supervillano; de los traumas familiares y decepciones que tresformen a un mozu fráxil y enfermu nuna bisarma peligrosa pa la sociedá. Pero nun ye un filme de superhéroes y supermalos al usu, sinón una obra maestra sobro los rellabicos más escuros de l’alma humana; sobro l’allargada solombra de los secretos de familia, sobro la llocura qu’añera na nuesa civilización. El premiu pa Polanski foi menos sorprendente magar los sos más que delicaes circunstancies personales. El so J’acusse ye una obra impecable y d’alta calidá. Con Jean Dujardin y Louis Garrel nos papeles del coronel Georges Picquart y el capitán Alfred Dreyfus, la cinta narra a la manera clásica, con usu depuráu de los recursos del cine, la hestoria del falsu casu d’espionaxe montáu contra’l xudíu Dreyfus na Francia de finales del XIX. La decisión de premiar al realizador polacu nun dexaba de ser comprometida teniendo en cuenta que se topa en busca y captura de la xusticia estadounidense por abusar d’una neña de 13 años en 1977. Tal fechu llevara a a presidenta del xuráu, l’arxentina Lucrecia Martel, a nun allegar a la sesión de gala de la película. Foi la esposa del director y actriz nesa y otres películes sos, Emmanuelle Seigner, quien recoyó’l galardón. La so intervención foi mínima, namá pa tresmitir l’agradecimientu del so home a los actores y el restu del equipu del filme. Una de les campanaes de la nueche diola Luca Marinelli al recibir la Copa Volpi al meyor actor, que paecía acutada a Phoenix pol so Joker. Marinelli collechó grandes aplausos na presentación de Martin Eden, de P ietro pero nun taba nes quinieles. Y unu de los momentos emotivos de la gala foi’l de la intervención d’Ascaride al estimar el so premiu a la meyor actriz . En recordando la so condición de descendiente d’inmigrantes, nacida en Marsella, l’artista dedicó la Copa “a tolos que duermen eternamente no fondero del Mediterráneu”. 0 FacebookTwitterPinterestEmail Anterior CCOO denuncia que la contratación de profesoráu de Lingua ye insuficiente pa cubrir la demanda de matrícula na asignatura siguiente El Clinic Nuevu Emprend pésllase esti vienres en Xixón Tamién te podria gustar La gala de los Goya va celebrase en... Avilés proyecta “Patriarcáu, l’organismu nocivu”, un documental contra... La última Palma d’Oru en Cannes brilla nel... Empiecen les proyecciones pa escolares de la Selmana... La Pola acueye la proyección de “Ente les... El Festival SACU va acoyer l’estrenu del cine-conciertu... La Factoría Cultural proyecta “La Mina en Llapaes” Güei proyéctase en La Pola “You resemble me” Servicios Sociales de Xixón presenta’l documental ‘Guapes Hestories... La BICC proyecta’l documental “Varsavsky – El científicu...