Jodie Foster diz que les películes de superhéroes “tán arruinando’l cine”

Jodie Foster diz que les películes de superhéroes “tán arruinando’l cine”
06 xineru 10:12 2018 Imprimir

Desque en 2008 Iron Man diera empiezu al Universu Cinematográficu Marvel, llegaron a los cines decenes de películes de personaxes de la Casa de les Idees, y lo mesmo fixo DC colos sos superhéroes y Jodie Foster vieno acabante dicir qu’estes películes “tán arruinando’l cine”.

Estes películes de superproducciones amasen millones de dólares en taquilla y tienen lexones de siguidores, sicasí, la oscarizada actriz y directora Jodie Foster amosó con entamar del añu’l so descontentu al respective de estes cintes. Nuna entrevista para Radiu Times la protagonista d’El silenciu de los corderos afirmó que los grandes blockbuster, especialmente los filmes de superhéroes, “tán arruinando” la industria cinematográfico. “Dir al cine convirtióse nun parque d’atracciones”, sentencia l’actriz californiana.

”Los estudios faen conteníos malos p’atraer a les mases y a los accionistes y ye como’l fracking, consigues grandes beneficios agora pero destroces la tierra”, afirma Foster. En concretu, l’actriz de Taxi Driver cargó directamente contra’l cine de superhéroes. “Ta arruinando los vezos cinematográficos de la población estadounidense y últimamente tamién de too el mundu”, llamenta Foster. ”Nun quiero faer películes de 200 millones de dólares sobro superhéroes”, afirma l’actriz, que confesó que namái trabayaría nun filme d’esti xéneru si la cinta tuviera “una psicoloxía realmente complexa”.

Los comentarios de Foster nun dexaron a naide indiferente, y el mesmu James Gunn, director de les dos películes de Guardianes de la Galaxa, contestó a l’actriz al traviés de Twitter, onde afirmó que cree que Foster ve’l cine de “una manera anticuada na qu’un blockbuster nun pue ser estimulante”.Anque Gunn almitió que la mayoría de franquicies “nun tienen alma de dalguna manera”, lo cual “ye un gran peligru pal futuru de les películes”, el director  asegura que “hai esceiciones”. A pesar de que’l director de Guardianes de la Galaxa afirma que “respeta la opinión de Foster y la so manera de ver la situación de Hollywood”, cree que l’actriz valora’l cine en función de “la so propia crecedera personal”, y non como un mediu de “comunicación”, como fai él.

  Categories: