JK Rowling va llanzar cuatro nuevos llibros electrónicos de Harry Potter

JK Rowling va llanzar cuatro nuevos llibros electrónicos de Harry Potter
03 xunu 09:35 2019 Imprimir

La escritora británica JK Rowling, autora de la saga Harry Potter, va llanzar cuatro nuevos llibros electrónicos rellacionaos coles sos famoses noveles a partir del próximu 27 de xunu, sigún anunció nos caberos díes de mayu so editorial Pottermore.

Na so páxina web, la empresa esplicó que les hestories van tar dedicaes a “afondar na rica hestoria de la maxa”, de forma que los siguidores del mozu magu y los sos amigos puedan enfusase en tolo relativo al mundu máxicu” que se describe a lo llargo de la saga. “Amás d’esquizar los oríxenes de la maxa al traviés de la hestoria y el folclore, los llibros electrónicos tamién van incluyir notes, páxines de manuscritos y dibuxos encantadores como se vio enantes en Harry Potter: Una hestoria de maxa“, señaló Pottermore.

Cada unu de los exemplares va basase nes llecciones estudiaes na Escuela de Bruxería y Hechicería de Hogwarts y va llevar l’encabezáu Harry Potter: Un viaxe al traviés de…, afechu del llibru Harry Potter: Una hestoria de maxa, que s’inspiró n’una esposición de la British Library, entamada en 2017.

El primeru va ser Harry Potter: Un viaxe al traviés de los encantos y la defensa contra les artes escures; el segundu Harry Potter: Un viaxe al traviés de mestranzos y herboloxía; el terceru Harry Potter: Un viaxe al traviés de l’aldovinación y l’astronomía; y el cuartu Harry Potter: Un viaxe al traviés del cuidu de criatures máxiques.

Mientres los dos primeres obres dixitales van publicase’l próximu 27 de xunu, les dos últimos facelo pocu tiempu dempués, avanzaron los sos responsables. L’artista londinense Rohan Daniel Eason ilustró los cuatro exemplares, que primeramente van tar disponibles n’inglés, francés, italianu y alemán al traviés de les principales plataformes de compra.

  Categories: