Jazz nel Centru trai a Larry Derdeyn’s Buanga

Larry Derdeyn ye un compositor y improvisador estadounidense (Connecticut) afincáu dende va dellos años n’Asturies, que protagoniza la sesión de Jazz que va tener llugar esti miércoles 9 a les 19, 30 nel Centru de Cultura Antiguu Institutu de Xixón.

Larry Derdeyn ye multi-instrumentista, anque’l so preséu principal ye’l pianu y los teclaos. Collaboró y formó parte de proyectos con músicos venceyaos a la cara más vanguardista del jazz, el rock y l’electrónica, como Leland Burr, Muttfather, Truébanu o Crumbling Palace, esti postreru con miembros de la OSPA. Dientro de la escena del jazz compartió formaciones con músicos como Tido Holtkamp, Fernando Arias, Tony Cruz, Ethan Winogrand, Michael Llee Wolfe, Mike Ringland, John Falcone, Marcio Dhiniz, Pablo Regnando o Chema Fombona.

Tamién ye l’alma creativa de Monu Volume, proyectu a solu futurista y primitivu nel que’l músicu crea loops y ambientes con distintos preseos.

Larry Derdeyn’s Buanga podría describise como latin jazz fusion, anque tamién s’aprecien elementos progresivos, esperimentales y cercanos al free jazz. Con una formación de quintetu, el grupu va interpretar pieces orixinales del álbum de Derdeyn, Buanga (2017), grabáu n’Asturies y dedicáu al músicu brasileñu Hermeto Pascoal, según delles composiciones nueves.

Centru de Cultura Antiguu Institutu Cuando:
9 de xunu de 2021 a les 19:30

Más información