Javier Menéndez gana’l 33 Mac Crimmon de gaita en Lorient

04 agostu 17:48 2018 Imprimir

Esti vienres, 3 d’agostu, entamó’l 48 Festival Intercélticu de Lorient y fízolo cola victoria del asturianu Javier Menéndez y el papel destacáu del tamién asturianu Fernando Vázquez.

Esti vienres, 3 d’agostu, entamó’l 48 Festival Intercélticu de Lorient que va desenvolvese hast’l 12 d’agostu y fízolo col troféu Mac Crimmon del que se fue dando a conocer el resultáu que per primera vegada foi tan apretáu que necesitó la regla del desempate que da’l meyor puestu al mas mozu que benefició a los asturianos. Hubo en total tres empates que tuvieron de resolvese favoreciendo a los gaiteros más mozos.

El primer empate fue ente los dos primeros, el ganador, l’asturianu Javier Menéndez y la gallega Raquel Viñas Otero. El segundu los empates fizo terceru al tamién asturianu Fernando Vázquez  Cárcaba y cuartu al gallegu Xesús Rodríguez Callejón. Y el tercer de los empates perxudicó al ganador del 2010 Jaime Álvarez Fernández, que quedó sestu, y xubió al quintu puestu al gallegu Manuel Ramón Seoane. Finalmente, el séptimu puestu fue pal gallegu Diego Prieto González y el octavu pal asturianu Diego Lobo Tuñón.

Javier Ménendez ye un nomáu gaiteru asturianu qu’entamó a estudiar l’instrumentu hai 15 años, en 2003, cola banda d’Avanti Cuideru. Algamó la diplomatura del conservatoriu Profesiona d’Uviéu en 2016, col pemiu de fin d’estudios y empobinó la so trayectoria musical a la Banda de Gaites d’Avilés que dirixe dende 2014.

El 33 Troféu Intercélticu pa solistes de Gaita Mac Crimmon que ye como agora se llama’l tradicional Macallan, xuntó compitiendo nel Palaciu de Congresos de Loriente, dende les 14,30 hores a cuatro gaiteros asturianos, tres gallegos y una gallega que foron actuando alternando y presentando una suite caún d’ellos na que s’entemecen composiciones asturianes, gallegues y bretones.

El concursu, que dura cásique tres hores, entamó cola actuación del asturianu Jaime Álvarez Fernández, que fora’l ganador na edición de 2017, al que siguieron el gallegu Xesús Rodríguez Callejón, l’asturianu Javier menéndez González, el gallegu Manuel Ramón Seoane Sánchez,  l’asturianu Fernando Vázquez Cárcaba, el gallegu Diego Prieto González y l’asturianu Diego Lobo Tuñón, pesllando’l concursu la gallega Raquel Vilas Otero.

La presencia femenina d’esti añu dende Galicia vino amosar que la presencia de la bretona Marie Le Cam en 2007 y l’asturiana Andrea Joglar, que ganara en 2010, nun van quedar como daqué testimonial na hestoria del concursu.

 

Loading Facebook Comments ...