Javier Gurruchaga y la Orquesta Mondragón inauguren los conciertos del Antroxu cola so xira “Que vien Trump”

Javier Gurruchaga y la Orquesta Mondragón inauguren los conciertos del Antroxu cola so xira “Que vien Trump”
24 febreru 14:19 2017 Imprimir

Esti vienres 24 a les 22 hores y na Plaza d’España (El Parche), Javier Gurruchaga y l’Orquesta Mondragón van inaugurar les cites musicales d’esti Antroxu 2017 n’Avilés col espectáculu de la so nueva xira “Que vien Trump”.

Va ser unu de los grandes conciertos d’estes fiestes, a los qu’hai que sumar Chambao y Blues Probes, amás de les verbenes coles orquestes Olimpus, Versión Orixinal y La Nueva Phila, y el Antroxu’s Dancie cola participación de los meyores DJ’s asturianos.

La Orquesta Mondragón

Dempués de la coronación como Reyes del Goxu y la Faba de “Los Arronxaos” (20.30 hores), peña que decidió qu’anguaño’l Antroxu esti dedicáu a los dibuxos animaos, la Orquesta Mondragón va tocar n’Avilés temes emblemáticos como “Viaxe con nós”, “Caperucita feroz”, “Ponte la peluca”, ente otres, amás de temes del so últimu discu, “Anda sueltu Satanás” (2016), col que celebren 40 años enriba de los escenarios.

La Orquesta Mondragón nació a mediaos de los setenta en San Sebastián, alredor de la personalidá del showman Javier Gurruchaga. Fueron pioneros en fundir música y teatru na escena española y converten cada cantar nun gag humorísticu cargáu de sana crítica. Agora lleguen a Avilés cola so nueva xira de conciertos, titulada “Que vien Trump”.

De siguío d’esta cita musical va celebrase la primera Verbena Antroxera. Va Ser cola Orquesta Olimpus a partir de la medianuechi na pista de la Esposición, en Les Meanes.

  Categories: