Javier Fernández niega que la FP sía una opción de segunda clas

Javier Fernández niega que la FP sía una opción de segunda clas
23 abril 10:06 2018 Imprimir

El presidente del Principáu, Javier Fernández, abogó esti sábadu por “acabar coles pantasmes de los vieyos estereotipos” que ronden a la Formación Profesional, mientres la so intervención na clausura del Campeonatu d’Asturies de Formación Profesional ‘Skills 2018′.

Nel campeonatu participaron 16 especialidaes, dende soldadura a peluquería, mecatrónica o ebanistería, y el presidente punxo a valir la calidá de los trabayos presentaos: “Énte esa exhibición, cuestionar equí la formación profesional sería peor que xuna descortesía; sería tan maleducáu como absurdu”, aseguró.

Aprosimao, dixo, ocho de cada diez emplegos correspuenden a cualificaciones propies de FP y namái los dos restantes, a titulaciones universitaries.  Fernández abogó por un bon sistema de FP p’actuar como “factor de cohesión social” y de competitividá empresarial, y asumió la responsabilidá del Gobiernu pa convertir la FP dual en una realidá irreversible n’Asturies que’l Principáu va tratar de siguir guarniendo hasta’l final de la llexislatura.

Na formación inicial, esplicó’l presidente, el Gobiernu aumentó la ufierta educativa hasta cuntar anguaño con 100 perfiles profesionales distintos, con 17.200 alumnos matriculaos. Na formación profesional dual punxéronse en marcha cinco programes nos años 2012, 2014, 2015, 2016 y 2017. A estes altures, los datos disponibles del quintu programa reflexen qu’hubo 34 centros participantes, 323 alumnos y 181 empreses, a les que s’incorporaron dalgunes tan significatives como Arcelor, EdP, Asturfeito o Zitrón.

  Categories: