Portada Cine Jared Leto va tener la so propia película como Jóker

Jared Leto va tener la so propia película como Jóker

by redacción asturnews
Jared Leto - Foto: Gage Skidmore (https://www.flickr.com/photos/gageskidmore/)

Jared Leto va quitase l’escayu que-y quedó tres ‘Escuadrón suicida’ y volverá metese na piel del Joker. Asina lo confirmó l’estudiu Warner Bros, quien ta prepando un spinn-off centráu nel villanu de Batman.

D’esta forma l’actor va poder desquitase del disgustu que-y provocó que na cinta de supervillanos dexaren fuera munches de les escenes que rodó. La edición dixital de la revista Variety foi la encargada de dar la esclusiva mundial. Según fontes de la publicación, amás del papel protagonista Jared Leto va exercer de productor executivu del proyectu.

Espérase que l’estudiu lleve a cabu la mesma estratexa para otros personaxes qu’apaecíen nesa película de David Ayeri, estrenada en 2016. Ello ye que Warner Bros. anunció apocayá que’l personaxe de Harley Quinn (encarnada por Margot Robbie n’Escuadrón suicida’) va tener la so propia película, titulada ‘Birds of Prey’.

La película entá nun cunta con guionista, polo que se desconoz cuando va llegar a les sales. Tampoco se sabe enagora si’l rodaxe va tener llugar antes o dempués del de la remortina d’Escuadrón suicida’, que la so producción va empezar en 2019. Va un añu tamién s’anunció que Robbie y Leto repitiríen los sos papeles d’antihéroes nuna película centrada nos personaxes de Harley Quinn y el Joker que rodaríen Glenn Ficarra y John Requa.

El proyectu sobro’l Joker va escurrir de forma independiente al anunciáu meses tras sobre los oríxenes del personaxe, una cinta que prepara Todd Phillips y que va suponer un nuevu puntu de partida pal universu cinematográficu de DC Comics. Nesi proyectu va ser Joaquin Phoenix quien interprete al villanu.

Tamién te podria gustar