Portada Sociedá Izquierda Xunida taría a un pasu de roblar un alcuerdu con Los Verdes d’Asturies

Izquierda Xunida taría a un pasu de roblar un alcuerdu con Los Verdes d’Asturies

by asturnet

La coalición Izquierda Xunida taría a un pasu de roblar un alcuerdu con Los Verdes d’Asturies de cara a les prósimes elecciones autonómiques y locales del 27 de mayu. Izquierda Xunida que tien actualmente una alianza electoral col Bloque por Asturies contaría en reeditar esta coalición a la que s’amestaría la fuerza ecoloxista.
La participación de Los Verdes nes candidatures d’Izquierda Xunida ye una tónica que se vien manteniendo en bien de comunidaes del Estáu mesmo por alcuerdos electorales o estables como sería’l casu d’Ezquer Batua-Berdeak o Izquierda Unida Los Verdes Convocatoria por Andalucía. Anque la so representación nel Parlamentu español se desenvuelva mediante un diputáu adscritu al grupu parlamentariu socialista.

Ente los compromisos qu’asumiríen les dos formaciones polítiques taría reservar el númeru 8 de la llista central a la Xunta Xeneral a Los Verdes, asina como la representación política de Los Verdes nes conseyeríes que xestionaría Izquierda Xunida, nel casu de la reedición del actual alcuerdu de gobiernu.
Les llistes municipales son un de los puntos principales d’esti alcuerdu. Nestes Los Verdes d’Asturies podríen algamar puestos de salida en dellos conceyos onde históricamente algamaron un bon númeru de votos, como’l casu d’Uviéu, conceyu nel qu’algamaron más de 1600 votos y que de repetise’l resultáu daríen-y a Izquierda Xunida el tercer conceyal na Casa Conceyu uvieína. Nel casu de Xixón Los Verdes algamaron 1999 votos que valdríen de sofitu pa qu’Izquierda Xunida mantuviera o llegara a aumentar la so presencia municipal.
Nes últimes elecciones autonómiques Los Verdes d’Asturies fueron la sesta llista más votada algamando 6621 votos. Los Verdes mantuvieron a lo llargo de la seronda de 2006 conversaciones con dellos partíos políticos asturianos como Izquierda Asturiana. Con esti últimu partíu Los Verdes algamaron una coalición electoral nel conceyu de Mieres que los situó como la cuarta fuerza política, nel casu de Mieres daríase por asegurada una plaza de salida de cara a la entrada nel ayuntamientu de Mieres del Camín pa un representante de Los Verdes.
Fontes d’Izquierda Xunida señalaron a Asturnews que l’alcuerdu con Los Verdes d’Asturies nun afecta a les negociaciones que tán manteniendo col Bloque por Asturies, y qu’esperen que la robla del mesmu se cellebre en poques selmanes.

Tamién te podria gustar