Izquierda Asturiana ruempe les conversaciones con Los Verdes

La formación de la izquierda asturianista denuncia’l “doble discursu d’IX” que diz poner condiciones “irrenunciables” pa formar gobiernu col PSOE al tiempu qu’ufre a Los Verdes puestos y cargos nel gobiernu. La Dirección nacional d’Izquierda Asturiana, qu’aconceyara n’Uviéu esti vienres, trató’l procesu de conversaciones con Andecha Astur y Los Verdes d’Asturies empobinaes a algamar un alcuerdu electoral pa les elecciones autonómiques y municipales.
Nesti conceyu Izquierda Asturiana tomó’l determín de dar por rotes les conversaciones con Los Verdes d’Asturies (LVA), “yá qu’esti partíu ta negociando un alcuerdu electoral con IU-BA”. Sobre esti alcuerdu que se ta negociando la Dirección Nacional d’IAS afirma que se tán negociando los puestos qu’Izquierda Xunida va a ufrir nel “nuevu gobiernu de colación col PSOE que tien pensao formar”. Ente eses condiciones la Dirección nacional d’IAS camienta que “nun ye creible tar negociando la construcción d’un polu alternativu a les polítiques del actual gobiernu y al mesmu tiempu negociar la participación, anque seya les migayes, nesi mesmu gobiernu”.
La Dirección d’Izquierda Asturiana volvió sorrayar la “hipocresia” d’Izquierda Xunida, “yá qu’esta formación vuelve a falar, como va cuatro años, de condiciones irrenunciables pa reeditar la coalición col PSOE”. IAS denuncia que la voluntá rial d’Izquierda Xunida ye “volver a formar parte del gobiernu” con independencia de les condiciones del mesmu.
Nel comunicáu recibíu n’ASTURNEWS la Dirección Nacional d’IAS perafítase na necesidá d’una candidatura unitaria de la esquierda verde y asturianista que trascienda les llendes de les organizaciones polítiques que la conformen. Esti mes IAS cellebrará’l so VII Alcuentru Nacional nel que la militancia de la organización algamará la decisión definitiva sobre les elecciones.