Portada Política IX y Podemos rexistren la propuesta de reforma pa la oficialidá del asturianu

IX y Podemos rexistren la propuesta de reforma pa la oficialidá del asturianu

by redacción asturnews

IX y Podemos rexistraron esti vienres la so propuesta conxunta de reforma estatutaria pa la oficialidá del asturianu. Ramón Argüelles dexó bien a les clares que se trata d’unu cambéu pa sumar a más fuerces polítiques d’izquierdes y de dereches y Andrés Vilanova, de Podemos, esplicó que la reconocencia de la dignidá del patrimoniu cultural nun tien por qué esperar.

Los catorce diputaos d’IX y Podemos rexistraron na mañana d’esti vienres na Xunta Xeneral del Principáu la Proposición de Llei de Reforma de la Llei Orgánica 7/1981, de 30 d’avientu, l’Estatutu d’Autonomía, pa declarar la cooficialidá del asturianu y del gallegu asturianu. Les dos fuerces polítiques, que según el Coordinador d’IX, Ramón Argüelles, tienen como oxetivu sumar a otros partíos d’izquierdes y de dereches pa protexer l’idioma asturianu y el gallego-asturianu, planteguen el cambéu del artículu 4 del Estatutu d’Autonomía. Cola nueva redacción l’Estatutu recoyería que “l’asturianu y el castellán son llingües oficiales d’Asturies. El gallego-asturianu ye tamién oficial nel so ámbitu territorial y nes relaciones de la ciudadanía cola Alministración Autonómica. Una Llei de la Xunta Xeneral va establecer el réxime d’usu y d’aplicación nes distintes alministraciones, tantu del asturianu como del gallego-asturianu. Tola ciudadanía tien derechu de conocer y emplegar llibremente les llingües oficiales n’Asturies y nenguna persona va poder ser discriminada en función de la llingua qu’emplegue”.

A xuiciu de Ramón Argüelles, Coordinador d’IX d’Asturies, ye un momentu importante porque per primer vegada suscríbese un documentu que pretende sumar: “Tendemos la mano a tol parlamentu porque ye una obligación cola cultura d’Asturies”, dixo’l dirixente d’IX acompañáu pola diputada Marta Pulgar y Mayka Barros y Victor Suárez, encargaos estos postreros de la negociación con Podemos y de l’área de Llingua asturiana de la coalición. Argüelles remarcó qu’esti ye un primer pasu pa consiguir que más diputaos empiecen a trabayar pola cultura asturiana, pa protexer al asturianu y el gallego-asturianu. diputaos de la izquierda y de la derecha, ensin que sía un arma refundiza contra naide, sinón pa sumar.

Pela so parte, la coportavoz de Podemos, Nuria Rodríguez señaló que se trata de “un día históricu” nel que s’asitia a Asturies nel sitiu que tien que tener, defendiendo los sos intereses. Tamién fizo un llamamientu por qu’otres fuerces polítiques sumar al alcuerdu y demuestren qu’Asturies ye lo primero pa toos y qu’esiste la oportunidá de demostralo a los asturianos nun momentu en qu’Asturies precisa muncha fuerza y trabayu. El diputáu de Podemos, Andrés Vilanova esplicó que la reconocencia de la dignidá del patrimoniu cultural nun tien por qué esperar. D’últimes incidió en qu’esta propuesta fai posible que se cumpla colos tiempos pa llevar a cabu esta reforma antes del fin de llexislatura.

Tamién te podria gustar