IX va usar la vía de los fechos pa defender l’usu del asturianu na Xunta

Concha Masa va realizar les convocatories y comunicación de la comisión de forma billingüe y considera illegal ya indefendible el plantegamientu del PP sigún declaró esta mañana tres de l’aconceyamientu de la Comisión Especial d’Estudiu sobre’l Réxime de Promoción y Protección del asturianu.

Concha Masa, diputada d’IX d’Asturies y presidenta de la Comisión Especial d’Estudiu sobre’l Réxime de Promoción y Protección del asturianu y les sos distintes alternatives, aseguró esta mañana qu’IX nun acepta, de nenguna manera, el plantegamientu de Mercedes Fernández de prohibir l’usu del asturianu na cámara y alvierte de que cada diputáu de la coalición va exercer el derechu d’utilizar la llingua. “Les declaraciones de la Presidenta del PP conculcan el derechu de tolos asturianos, y en particular de los parllamentarios, ya IX nun va parar hasta que la Llei d’Usu y l’Estatutu d’Autonomía, que lu recuerdo blinda l’usu, promoción y protección del asturianu, sía de plena aplicación na Xunta Xeneral del Principáu”, alvierte la diputada. Masa considera “illegal y indefendible” el planteamientu del PP de que’l castellán sía la única llingua del parlamentu n’Asturies.

Nesti sentíu IX va utilizar la vía de los fechos, realizando les convocatories y comunicaciones de la comisión n’asturianu y castellán, como la vía del derechu. Nesta opción, el grupu parlamentariu d’IX acaba de pidir por escritu a la Xunta de Voceros qu’afite los criterios sobre l’usu del asturianu na Xunta Xeneral, de cuenta que queden convenientemente establecíes les riegles d’usu, utilizando como marcu normativu l’Estatutu d’Autonomía y la Llei d’Usu y Promoción del Bable Asturianu”. “Nun puede ser que la Xunta Xeneral sía un espaciu llibre d’asturianu” y ónde se-y pongan vetos al marxe de les lleis, cosa que nun tendría d’asoceder nin equí nin en nenguna institución pública de la nuesa comunidá”, esplicó Masa al términu de la xunta.

La comisión d’esta mañana dio’l vistu bonu a les solicitúes d’información a distintes instituciones sobre la situación y usu del asturianu, dende’l l’alministración del Principáu, a l’Academia de la Llingua o los conceyos asturianos, y, polo xeneral, sobre la situación sociollingüística del asturianu. Tolos grupos presentaron pidimientos sacante’l PP. Concha Masa aprovechó tamién la acción reivindicativa entamada pola Xunta Pola Defensa de la Llingua y la presencia de la pita pinta, per primer vegada de nuevu na Xunta Xeneral, pa dar por confirmada la presencia d’IX na concentración que ta convocada pal próximu xueves 25 de febreru.