Portada Conceyos IX sollerta del riesgu del proyectu en marcha pal Chao San Martín

IX sollerta del riesgu del proyectu en marcha pal Chao San Martín

by redacción asturnews

IX sollerta del riesgu del proyectu en marcha pal Chao San Martín y reclama que se revise pa evitar perdes irreparables. Concha Masa anuncia que van presentar una iniciativa para protexer l’enclave y que van riquir al Principáu pala revisión por espertos arqueólogos de les actuaciones.

IX va presentar una iniciativa parlamentaria pa protexer de forma efectiva’l yacimientu arqueolóxicu del Castru del Chao San Martín. La diputada Concha Masa sollertó de los riesgos del proyectu de recuperación del enclave yá que, al so xuiciu, realizóse ensin “les debíes prevenciones” tocantes a los informes técnicu-arqueolóxicos. Pala parllamentaria, tán resalvándose precuros reconocíos nestos casos nos protocolos internacionales d’actuación nesti tipu de yacimientos que, añedió, deben, sobremanera, “tar informaos por espertos en patrimoniu arqueolóxicu y que, amás, tienen de respetar, naturalmente, los elementos qu’ellí s’atopen. Esto ye, qu’en nengún casu puede reconstruyise los elementos arquitectónicos sinón qu’hai que respetalos”-

La intervención nel Castru del Chao San Martín, sicasí, alloñase d’esos parámetros: “esti proyectu llevose a cabu ensin los informes preventivos; fálta-y tamién un informe d’impactu arqueolóxicu;, introduz l’usu de materiales y procedimientos bien agresivos, inclusive materiales como’l formigón armáu que pretende utilizase pala reconstrucción de murios y pensamos que puede alteriar d’una forma irreversible elementos arquitectónicos que tán inda en víes d’estudiu”.

Nun acaben equí los problemes, según denunció Concha Masa, por culpa de que s’inclúi la construcción d’un centru d’interpretación bien próximu a les escavaciones que tán agora al descubiertu y en terrenes que, enfatizó, “considérense fértiles” dende’l puntu de vista arqueolóxicu, por culpa de que se sabe qu’hai inda elementos d’estudiu entá por escavar y que d’esta forma sería inaccesible. Por si fora poco, reprochó la diputada d’IX, l’edificiu “estorbaría la vista panorámica del Chao tal como pue contemplase agora dende’l muséu, que ta un pocu más llueñe y al que s’apuerta per una pista piatonal”:

El proyectu nun cumple los requisitos que debiera y el so desenvolvimientu podría estropiar de forma inevitable ya irreversible’l yacimientu, concluyó Concha Masa. “Dende’l nuesu grupu parlamentariu queremos pidir esplicaciones al Conseyeru y desixi-y que retome’l proyectu y que se faiga revisar por espertos arqueólogos como correspuende y como dicten, per otra parte, les normes internacionales”. Ello ye que la Carta de Venecia o la carta de Cracovia recueyen considerancies que tienen de tenese en cuenta pa cualaquier proyectu d’estes característiques, recordó Concha Masa.

Tamién te podria gustar