Portada Conceyos IX sofita la manifestación d’ANADEL contra la tortura animal en Xixón d’esti sábadu

IX sofita la manifestación d’ANADEL contra la tortura animal en Xixón d’esti sábadu

by redacción asturnews

Izquierda Xunida vieno acabante d’asoleyar esti día un comunicáu abogando pola prohibición del maltratu y la tortura nes corríes de toros n’Asturies y llamando a participar na manifestación contra la tortura animal convocada por ANADEL el 13 d’agostu en Xixón.

El Secretariu d’Ellaboración, Programa y Participación d’IX Asturies, Javier Suárez Llana, adelantra que la formación va treslladar a la Xunta Xeneral “la necesidá de modificar la Llei de Tenencia, Protección y Derechos de los Animales de manera que se prohiban el maltratu y la tortura animal en tolos espectáculos”.

Izquierda Xunida d’Asturies considera que ye’l momentu d’avanzar nes polítiques de protección y bienestar animal, y en concretu, n’aspeutos como la erradicación del maltratu y la tortura animal acomuñada a espectáculos como les corríes de toros o los circos. Nesti comunicáu asoleyáu pela mañana nesti martes 8 d’agostu, el Secretariu d’Ellaboración, Programa y Participación, Javier Suárez Llana, considera que “ye ética y moralmente indefendible basar un espectáculu nel maltratu animal, y por eso’l Grupu Parlamentariu d’Izquierda Xunida, cola participación de la Área de Protección Animal, va treslladar nel próximu períodu de sesiones de la Xunta Xeneral la necesidá de modificar la Llei de Tenencia, Protección y Derechos de los Animales de manera que se prohiban el maltratu y la tortura animal en tolos espectáculos na nuesa Comunidá Autónoma”.

IX quier aprovechar la reforma de la Llei asturiana pa introducir cambeos n’aspeutos rellacionaos cola tenencia, la vienta y el tráficu d’animales, la protección de la fauna autóctona montesa y les especies migratories, el tratu a los animales n’esplotaciones agrícoles, ganaderes, núcleos zoolóxicos o los usaos n’esperimentación, y l’endurecimientu de les sanciones por incumplimientu de la normativa de protección animal.

Per otra parte, l’Área de Protección Animal d’IX d’Asturies fai un llamamientu a la ciudadanía pa participar viviegamente na manifestación contra la tortura animal convocada por ANADEL, que se va desenvolver en Xixón el próximu 13 d’agostu coincidiendo cola Feria Taurina de Begoña. La manifestación va salir de la Plazuela San Miguel a les 16.30 hores. L’Área va participar na convocatoria con pancarta propia y va desenvolver una campaña en redes sociales los díes previos sol lema “Stop Maltratu Animal”.

Tamién te podria gustar